Алдағы жылдың 15 ақпан күні кеңес әскерінің Ауғанстаннан шыққанына 30 жыл болады. Осыған орай Қазақстан Республикасының Үкіметі Ауғанстан соғысына қатысқан жауынгер-интернационалистерге тиісті құрмет көрсетуді, айтулы күнді атап өту жөнінде шешім қабылдады.
Ауғанстан соғысында қаза тапқан қазақстандық жауынгерлерге тағзым ету және бүгінде бейбіт өмірде жүрген ардагер азаматтарға құрмет білдіру ісін үйлестіру Парламент депутаты, жауынгер-интернационалист Бақытбек Смағұл жетекшілік ететін Ауғанстан соғысы ардагерлері ұйымдарының «Қазақстан ардагерлері» қауымдастығына жүктелді. Бүгінгі таңда республика бойынша түрлі патриоттық шаралар басталып кетті.
Астана қаласының «Ауғанстан соғысы мүгедектері мен ардагерлері одағы» қоғамдық бірлестігі елорда мектептерінде «Ерлік сабағы» акциясын бастады. Мәселен, қаладағы №1, №7 және №15 мектептерде оқушылармен кездесулер ұйымдастырылды. Бұл мектептерде оқып, әскерге аттанған, кейіннен Ауғанстан соғысында болып, қаза тапқан Әділ Даулетбаев, Александр Халявка, Владимир Ким, Василий Нестеров, Анатолий Каюкин, Фанус Адилов, Александр Шанц сынды жауынгерлерге естелік тақталары орнатылған. Алдағы уақытта басқа мектептерде де осындай шаралар жалғаспақ.
– Ауғанстан соғысына қатысқан 17 астаналық жауынгер ерлікпен қаза тапқан болатын. Осы азаматтардың отбасыларына қолдау көрсету және сол майдангер достардың есімін еске алуға арналған шаралар ұйымдастыру – біздің ұйымның басымды мақсаттарының бірі. Сондықтан осы бағытта әскери-патриоттық жұмыстарды бастап кеттік. Сонымен қатар қаза болғандардың ата-аналарына көмек көрсету жоспарланып отыр, – дейді Астана қаласының «Ауғанстан соғысы мүгедектері мен ардагерлері одағы» ҚБ төрағасы Серік Кенжебеков.
