2007 жылдан бері елорда тұрғындарына қызмет көрсете бастаған Астана қаласы әкімдігінің №4 емханасы бүгінде мыңдаған адамның денсаулығын сақтау жолында тыңғылықты жұмыс атқарып отырған мекеме саналады.
Денсаулық сақтау саласының үздігі, тәжірибелі дәрігер Серік Шаймерденов басқаратын аталмыш емханада бесіктегі баладан бастап, қартайған ардагер қауымына алғашқы медициналық-санитарлық көмек беру, аурудың алдын алуға бағытталған диагностикалық және емдеу қызметтерін жүргізу, тегін медициналық көмектің кепілді көлемі аясында мамандандырылған ем-дом қызметін көрсету жүзеге асырылып отыр.
Аталмыш емханада науқас адамдарды емдеу қызметінің сапасын көтеруге ерекше талап қойылған. Астана қаласы әкімдігінің қолдауымен қазіргі заманғы медициналық қондырғылармен, құрал-жабдықтармен қамтамасыз етілген мекемеде науқастарға сапалы қызмет көрсету үшін барлық жағдай жасалған. Емхана ішіндегі күндізгі стационар қызметіне жүгінушілер қатарының жылдан-жылға арта түсуін сол дәрігерлерге деген сенімнің көрсеткіші деуге болады.
Медициналық қызмет көрсету бойынша Астана тұрғындарының жақсы ілтипатына бөленіп отырған емхананың бір айтарлық ерекшелігі, мұнда 2014 жылдан бері ардагерлер бөлімі жұмыс істейді. Астана қаласы әкімінің тапсырмасы бойынша Ұлы Отан соғысына қатысушылар мен оларға теңестірілген азаматтарға орталықтандырылған қызмет көрсету мақсатында құрылған бөлімде, шын мәнінде, ерекше емдеу қызметіне, мамандандырылған көмекке мұқтаж адамдарға ем-дом беріліп келеді. Олардың қатарында Ұлы Отан соғысына қатысқан ардагерлер, жауынгер-интернационалистер, Чернобыль апаты зардабын жоюға қатысушылар, Семей ядролық полигоны қасіретін тартушылар, соғыс кезіндегі тыл еңбеккерлері, дербес зейнеткерлер және басқа да жеңілдік иелері бар. Ал мұндай категориядағы азаматтарға қызмет көрсету айрықша жауапкершілікті және біліктілікті талап ететіні сөзсіз. Осы тұрғыда 2500 адамға қызмет көрсетіп отырған бөлімдегі мамандарға ардагер қауымның айтар алғысы шексіз деуге болады. Бөлім меңгерушісі болып отырған білікті дәрігер Светлана Королькова, аға мейірбике қызметін атқаратын тәжірибелі маман Гүлжайнат Абдешева, дәрігерлер Гүлнар Бейсенбаева, Гүлсім Маулетбаева, Данияр Әбдіхадиров, медбикелер Әйгерім Орманова, Ләззат Хамидуллина, Жансая Сәлімгереева, Бақытжамал Иманберді және басқалары екі учаскенің жұмысын жүйелі үйлестіріп, науқастарға сапалы қызмет көрсетіп келеді.
– Соғыс ардагерлері мен Үкімет тарапынан жеңілдіктер берілген басқа да азаматтарға қызмет көрсетіп отырған №4 қалалық емхана ұжымына айтар алғысымыз шексіз. Мұнда қашан келсек те, дәрігерлеріміз жылы жүзбен қарсы алады. Қажет болған жағдайда күндізгі стационардан да ем аламыз. Емхана басшысы Серік Шаймерденов тек қана емдеу шараларына маңыз беріп қоймай, осында емделетін ардагер ұрпаққа құрмет білдіру, сондай-ақ, басқа да мемлекеттік және ұлттық мерекелерге арналған шараларды ұйымдастырады. Бұл да емделушілер үшін үлкен әлеуметтік қолдау десе болады, – дейді ауған соғысына қатысушы жауынгер-интернационалист Сембек Қабиев.
Иә, емдеу қызметінде осындай ерекше міндеті бар емханаға келушілердің көңіл күйі көп нәрсені аңғартады. Бұл ретте №4 емхананың қала тұрғындары тарапынан жақсы сөзге, игі құрметке бөленіп жүргенін тағы да қайталап айтқымыз келеді. Емхана ұжымының сапалы қызмет көрсетуге бағытталған жұмысы жемісті бола бергей!
Ғалым ҚОЖАБЕКОВ
