Астана еліміздің бас қаласы болғандықтан жастар көп тоғысатын шаһарға айналып отыр. Бас қалаға білім алуға, сонымен қатар, жұмыс істеуге келетін жастардың қатары жыл санап арта түсуде. Сондай жастардың басын қосқан оқу ордаларының бірі Л.Н.Гумилев атындағы Еуразия Ұлттық университеті. Біз бүгін осы оқу орнының ректоры, Астана қаласы мәслихатының депутаты Ерлан Сыдықов мырзаны әңгімеге тартқан едік.
– Елбасының бастамасымен ашылған Еуразия Ұлттық университеті елордамыздағы ең үлкен оқу ордасы саналады. Мұнда қанша студент білім алады?
– Бүгінде Л.Н.Гумилев атындағы Еуразия Ұлттық университетінде 17 мың студент оқып жатыр. Еліміздің бас қаласында білім алып жатқан жастарды шын бақытты деп есептеймін. Олар осында өткен төрт жылда қос дипломды қатар алып шығады. Бірі – жоғары оқу ордасында алған мамандығын растайтын құжаты болса, Астана төрінде өткен оқиғалардың тәжірибесі мен өнегесі де молықтырып, көңілге түйіп қайтады. Өйткені, біздің студенттеріміз саяси қоғамдық өмірі қайнап жатқан ортада қалыптасуда. Мұның бәрі үлкен – мектеп. Елордаға таудай талабы бар, өзіне сенген талантты жастар ғана келеді. Үш тілде еркін сөйлейтін біздің жастарымыздың белсенділігі жоғары болып, қатарынан озық тұруының бір себебі Астана қаласының статусына да байланысты. Олардың жан-жақты дамуына қолайлы жағдай жасап, талабын ұштай білуіміз керек.
– Сіз бірнеше жыл қатарынан Жергілікті басқару органының құрылымы – қалалық мәслихатқа депутат болып сайландыңыз. Сол тәжірибелеріңізбен бөлісе отырсаңыз.
– Жалпы саны 15 жыл мәслихат депутаты ретінде, жергілікті басқару жұмысына араласып келемін. Алдымен үш шақырылым бойынша Шығыс Қазақстан облысында және Астана қаласының қалалық мәслихатына екі шақырылым бойынша қалалық мәслихат депутаты болып отырмын.
Осыдан бірнеше жыл бұрын қандай мәселелер қойылушы еді? Қазіргі күнгі сайлаушыларымызды нендей сұрақтар мазалап жүр? Айырмашылығы жер мен көктей. Бұрындары жылу мен су, отын-көмірдің тапшылығы, жалақы, зейнетақының дер кезінде төленбеуі әр сессияның күн тәртібінен түспейтін. Күрделі кезең артта қалып, бұның бәрі шешілгелі қашан. Бүгінде тұрғындар аулалар мен көшелердегі жасыл желектің күтімі, жолдарға бағдаршамдар орнату, қоғамдық тәртіптің сақтау мәселелеріне мән береді. Бұрындары тұрғындарымыз сұрақтарын төпелеп, депуттардың ізіне шам алып түсетін. Қазір халықтың белсенділігі саябырсыған. Себебін сұрасақ, «күйіп тұрған шаруа жоқ» деген жауап естиміз. Ал, өзге қалалардан озық тұрған, үлгілі шаһардың даму бағдарламасында барлық жағдайлар бүге-шүгесіне дейін қамтылып, мәселенің ұсақ-түйегіне дейін бәрі қала басшылығының назарында тұр.
– Дегенмен, халықтың әлеуметтік жағдайын жақсартудың шегі болмайтын болар?
– Әрине, қала аумағы артып, тұрындардың да саны миллионға жеткенде жергілікті атқарушы органдарға қойылатын талаптың салмағы да артады. Қазірде ескі үйлерді сыру мен көліктердің тұрағы – бірінші кезекке шығып тұр. Аулаларды абаттандыру, оны спорт пен демалыс алаңқайларына айналдырып, салауатты өмір салтын қалыптастыру қажеттілігін сезінеміз.
Неше жылдан бері шешімін таппай келе жатқан автокөліктердің тұрағы мәселесі қала бойынша басты мәселе деп едім. Бір жағынан алсаңыз, жеңіл көліктердің көбеюі халықтың ауқаттылығын білдіреді, екінші жағынан қала көшелеріндегі кептеліс автотұрақтар мәселесін алға шығарды. Тұрғын үйлердің алдын
бермейтін жеке көліктер жедел жәрдем, өрт сөндіруші тағы басқа қызметтердің қозғалысына қиындық тудырып отыр. Бұл мәселені шешу қала басшыларының басты назарында. Инвестиция тарту арқылы автотұрақтар салынып, жаңа орындар ашылған кезде бұл мәселе де күн тәртібінен түседі деп ойлаймын. Айта кету керек, батыстың мегақалаларының тәжірибесі зерттеліп жатыр.
– Қаланы салғанда болжамдағы біраз жылдан кейін ғана 300-400 мыңға жетеді деген халық саны қазір миллионға жетеғабыл, бұл шегі емес. Ендеше, миграцияның мәселелері қордаланатын болар?
– Жыл сайын 40 мыңға жуық адам Астанаға келеді екен. Олардың барлығының әлеуметтік жағдайы әртүрлі. Алған білімі, мәдениеті мен дүниеге көзқарасы сан түрлі болса да жиналып келіп, астаналық менталитетті қалыптастырады. Ендігі жерде мониторинг жасап, қаншама адам қайдан келді, оның жергілікті ортаға қандай әсері бар, олардың күшін қала дамуына қалай жұмылдырамыз деген зерттеулер жүргізу керек. Жалпы астаналық қалалардың өзгешілігі болады. Мұнда халық жан жақтан жиналады. Келген жерлерінің мәдени өзгешіліктерінің бір бөлшегін алып келеді. Осыны ескере отыра ортақ бағыттағы қалалық менталитетті қалыптастыратын идеология ойлап тауып, астаналықтарды тұтастыра білуі керек. Елордамыздың бұрыннан қалыптасып қалған моноқалалардай емес, өзгешелігі бар дейтінім сондықтан.
Қала тұрғындарының қауіпсіздігі көбімізді ойландыратыны анық. Бұл ретте бейнекамералар құқық бұзушылықтың алдын алып, қауіпсіздік шараларын біршама жетілдіріп отыр. Қазір әрбір аулалардағы, үйлердің кіреберісіндегі бейнекамералар орталықтандырылған полиция қызметінің құзіретіне беріліп, барлық жағдайлар қырағы тексеріліп отырады. Құқық бұзушылық азайды, дегенмен «нөлдік шыдамдылық», яғни тұрғындар белсенділігінің қылмыс санын қысқартуға тікелей әсері бар.
– Білім беру саласының маманы ретінде орта білім беру орындарының жұмысы қандай деңгейде деп айтасыз?
– Оқушылардың білім шамшырағы – мұғалім екені белгілі. Еліміздің бас қаласында ұстаздарды даярлайтын педагогикалық оқу орыны жоқ. Бұрындары болған бұл оқу орыны Еуразия университетіне қосылды. Алайда, университет зерттеу орталығы болған соң орта мектеп мұғалімдерін дайындауға мүмкіндігі жоқ әрі тиімді де емес. Меніңше, бұл мәслихатта қаралып, арнайы оқу орынын ашу өмір талабы деп есептеймін.
Бүгінгі күнге дейін, өзге өңірлерде даярланған мамандар ұстаздық етіп келеді. Жүйе бір болғанмен, өзіне тән түйінді тұстары бар. Ал астаналық білім берудің өзіндік үлгісін қалыптастыратын, осы қалада өсіп-жетілген ұстаздардың да біліктігі ерекше болатыны белгілі. Мұның әлеуметтік жағы да бар. Елордада педагогикалық білім алып ұстаздық жолын осы жерде бастаған тұрғылықты адам болса, оны үй-жаймен қамтамасыз етудің қажеттілігі жойылады.
– Айналып келгенде, жастар үшін әлі де талай жұмыстар атқарылуы керек дейсіз ғой?
– Осыдан бірнеше жыл бұрын әріптестеріміз бірлесе әлеуметтік жағынан аз қамтылған студенттердің қоғамдық көлікте жүру жолақысына жеңілдіктер қарастырған болатынбыз. Бұл мәселе шешілді, енді жалпы студенттердің қоғамдық көлікте жүру ақысын қайта қарау мәселесін шешу керек сияқты. Айта кету керек, мәдени спорт мекемелері жұрттың бәріне қолжетімді емес. Жастар кинотеатрларға барғысы келеді, бірақ оның да бағасы арзан емес. Астана – жастар қаласы. Олай болатын болса, сол қаланың болашақ иелері жастарға бүгіннен бастап жағдай жасалуы керек.
Әңгімелескен Айгүл УАЙСОВА