Ұлттық академиялық кітапханада «Әділбек Абайділданов шығармалары» атты көлемді кітаптың тұсаукесері өтті. Мұнда небары елу екі жасында өмірден озған көрнекті ақынның әр жылдары жарық көрген «Ақ қайың», «Салтанат», «Қыран», «Алыс көкжиек», «Маржан» атты кітаптарынан таңдап алынған өлеңдері мен поэмалары топтастырылған.
Қазақстан Жазушылар одағының Астана қалалық филиалы ұйымдастырған шараға елордалық қоғам қайраткерлері, қаламгерлер және студент жастар қатысты.
Жиында халықаралық «Алаш» әдеби сыйлығының иегері, ақын Серік Тұрғынбекұлы баяндама жасап, Әділбек Абайділдановтың жан әлемін, суреткерлік қырын әңгімелеп, ақындық қуатын ашатын өлеңдерін жан-жақты талдады. Жазушы, ғалымдар Қойшығара Салғараұлы мен Сұлтан Оразалинов, Қуаныш Жиенбай, режиссер Сәулебек Асылханов, аудармашы Мәткерім Әкімжанов сынды кеш қонақтары ақынның өмірі мен шығармашылығы жайында естеліктер айтты. Олар ақынның қыран текті болмысын, кербез тұлғасын әңгімелеріне арқау етті. «Әділбек Абайділданов өткен ғасырдағы қазақтың азат ойлы, ғажап суреткер ақындарының алдыңғы шебінде тұрады» десті.
Салтанатты рәсімді Қазақстан Жазушылар одағы Астана филиалының төрағасы, ақын Несіпбек Айтұлы қорытындылады.
Ауыт МҰҚИБЕК
