ЕРТЕЛЕТІП ЖҮГІРДІ ЕЛОРДАЛЫҚ ЖҰРТШЫЛЫҚ
Жексенбі күні елорда жұртшылығы жаппай жүгіруге шықты. Астана қаласының Туризм, дене тәрбиесі және спорт басқармасы ұйымдастырған бұқаралық шараға мемлекеттік мекемелер мен қоғамдық ұйымдар өкілдері, мәслихат депутаттары мен әскерилер, студенттер мен мектеп оқушылары, белгілі спортшылар және әуесқой жүгірушілер қатысты.
Қазақстан Республикасы Президентін сайлау науқанын қолдауға арналған спорт шарасының ашылуында еңбек ардагері, спорт саласының майталманы Федор Марьин сөйлеп, алаңға жиналған астаналықтарға білім мен спорттың шыңынан көрініп, денсаулықты шынықтыруға бағытталған осындай шараларға белсенділікпен қатыса берулеріне тілектестік білдірді. Олимпиада ойындарының чемпионы, даңқты шаңғышы Владимир Смирнов та елорда төрінде көпшілікке арналған осындай спорттық шаралардың жиі өтіп тұрғанын қолдайтынын жеткізіп, халықтың ең басты байлығы денсаулық екенін еске салып, бұқаралық жарысқа қатысушылардың бәріне сәттілік тіледі.
Бұқаралық жүгіру алдында қатысушыларға Қазақстан Президентін сайлауының ресми символикасы бейнеленген футболкалар мен бейсболкалар таратылды. Салтанатты жағдайда Қазақстан әнұраны шырқалғаннан кейін жүгіріс басталып кетті. Кенесары көшесі бойымен Қ.Мұңайтпасов атындағы стадионға дейін жүгірген жұртшылықтың жүзінен сергек көңіл-күйді аңғардық. Мәреге жеткен жүгірушілер бір-бірін құттықтап, мәре-сәре болып жатты.
Түйіндеп айтқанда, ертелетіп жүгірген елордалық жұртшылықтың көтеріңкі көңіл-күйіне қарап Президент сайлауына да осындай белсенділікпен қатысады деген ой түйдік.
Ғалым ҚОЖАБЕКОВ