ЕРТЕҢ – СОҢҒЫ ҚОҢЫРАУ
Ертең Астанада алтын ұя мектебінен арман жолына аттанғалы отырған 5 мың елордалық түлектерге соңғы қоңырау соғылмақ.
Сондай-ақ, дәл сол күні мектеп бітірушілер үшін сағат 13.00-де «Бәйтерек» монументінің жанында «Біз – ел болашағымыз» атты мерекелік шеру мен би кеші ұйымдастырылады. Концерттік бағдарламаға қалалық ұжымдар қатыспақ.
Сонымен бірге, 25 мамырда сағат 17.00-де Оқушылар сарайында дарынды балаларға арналған «Триумф» балы өтеді, онда республикалық, халықаралық конкурстардың, ғылыми жобалардың және олимпиадалардың жеңімпаздарына құрмет көрсетіледі. Биылғы шара «Астана дарыны» өңірлік ғылыми-практикалық орталығының 10 жылдығына арналып отырған көрінеді.
Сөз арасында айтып өтейік, 2015-2016 оқу жылында елордалық оқушылар АҚШ, Бразилия, Грузия, Ресей, Оңтүстік Корея елдерінде халықаралық олимпиадалар мен ғылыми жарыстарда 268 медаль
еншілеген. Республикалық олимпиада мен ғылыми жобалар конкурсында бас қалада білім алып жатқан оқушылар командасы, жалпы командалық есепте 1-ші орын алып, «Үздік команда» атанды.
Ал 17 маусымда түлектерге мектеп бітіру куәлігі табыс етілмек.
Азамат ЕСЕНЖОЛ