Астана қаласы Есіл ауданы әкімдігінде «Мектепке жол» республикалық акциясы басталды.
Іс-шараға Есіл ауданының әкімі Дәрменияр Қыдырбек-ұлы мен «Полимерстрой-Қазақстан» жауапкершілігі шектеулі серіктестігінің атқарушы директоры Бауыржан Қожабеков қатысып, сөз сөйлеп, алдағы оқу жылының басталуымен құттықтап, балаларды озат оқуға шақырып, оқушылардың қадамына сәттілік тіледі,деп хабарлайды astana-akshamy.kz.
Акция барысында халықтың әлеуметтік осал тобына жататын отбасы балаларына меценат ұйым «Полимерстрой-Қазақстан» компаниясының атынан оқу-құралмен жабдықталған 100 портфель сыйға тартылды.
– Ауданымызда «Мектепке жол» акциясы аясында 2018 жылдан бері 3000-нан астам оқушы меценаттар атынан мектеп формалары және құрал-жабдықтарымен қамтамасыз етілді. Жалпы, мұндай іс-шаралардың өтуі ата-аналардың мойнындағы ауыртпалықты азда болса жеңілдетеді деп ойлаймыз. Оқушылардың мектепке баруына өз септігін тигізіп, көмек қолын созып жатқан азаматтарға алғысымызды білдіреміз. Бұл да болса халқымыздың береке-бірлігін, ел азаматтарының халқына жанашыр екендігін білдіретін іс-шараның бірі деп бағалауға болады, – дейді Астана қаласы Есіл ауданы әкімі аппаратының әлеуметтік сала бөлімінің басшысы Назгүл Ахметова.
Ал қайырымдылық акциясына оқушыларын алып келген №45 орта мектептің педагогы Мәдина Әбілқасымова көмек көрсетіп, балалардың оқуға баруына септігін тигізіп жатқан азаматтарға дән риза екенін жеткізді.
Атап айтар болсақ, бұл жолғы қайырымдылық амалына аталған демеуші компания 3 миллионға жуық қаражат бөлген. Тағы бір айта кетерлігі, акция барысында демеуші азаматтарға Есіл ауданы әкімінің атынан «Алғыс хаттар» табысталды.
Шапағат ӘБДІР
