Астанада Funny sport жобасы аясында кезекті іс-шара өтті, деп хабарлайды astana-akshamy.kz
Қаламыздың көрнекті жерінің бірі – «Жетісу» саябағында «Аула ойындары» іс-шарасы өткізіліп, арқан тарту, секірмек, қол күрес, асық ату, баскетбол, үстел ойындары т.б. түрлерінен 1 мыңға жуық адам сынға түсті.
«Бала кезіміздегі аула ойындарының пайдасы орасан. Біріншіден, бұл өзара тез тіл табысудың әдісі. Осы арқылы жеткіншектер ұялмай, тез қарым-қатынас құрады, дос табады. Екіншіден, қаланың әсем жерлерімен танысады. Әр апта сайын өткізіліп жатқан шарамыз алдын ала түрлі саябақтарда жоспарланған. Жазғы демалыс кезінде тек Астананың ғана емес, өзге қаладан да қыдырып келетіндер саны көбейеді. Бала кезден ойын арқылы спортқа бейімдесек, есейгенде өзіне де жақсы болатыны сөзсіз», – дейді жобаның ұйымдастырушысы Тимур Есімов.
Толыққанды тегін өткізілген шараға еліміздегі спорт пен жастардың дамуына атсалысып жүрген Сергей Цырульников та қатысып, өзінің шеберлігін көрсетті.
Кеш барысында тек ойын ғана емес, жеткіншектер өз шеберліктерін де көрсете білді. Мысалы, 6 жастағы Нұрали атты бала көпшілік алдында 40 мәрте кеудені жерден еш қиындықсыз көтерді.
«6 жастамын. Қазірден кеудені жерден көтеру спортына дайындалып жүрмін. Өскенде Париж Олимпиадасында Елдос ағамыз секілді чемпион болғым келеді. Дзюдо спортымен айналасатын боламын», – деді Нұрәли Жұмаханов атты жас қатысушы.
Жоба соңында қала тұрғындары «Таза Қазақстан» экоакциясы аясында өздерінің қоқыстарын да бірге жинап кетті.
Әр аптаның сенбі және жексенбі күндері өтетін спорттық шаралар жайлы толық ақпаратты Funnysport.kz сайтынан біле аласыз.
