Грант иегерлері анықталды
Кеше барша жұртшылық асыға тосып жүрген мемлекеттік білім грантына ие болған талапкерлердің тізімі жарияланды. Мемлекеттік білім гранттарының иелерін анықтайтын комиссия бөлген 31 702 грант иегерлері анықталды.
Оның ішінде 2 950 орын жоғары оқу орындарының дайындық бөлімдерінде оқуға, 28 752 грант бірінші курсқа қабылдауға қарастырылған.
Соңғы жылдары елімізде индустриялық-инновациялық даму бағдарламасы жүйелі дамып келеді. Биылғы мемлекеттік гранттың көп бөлігі де осы мақсатты жүзеге асыруға бағытталған. Сондықтан да 12 593 грант техникалық және технологиялық мамандықтарға бөлінген. Сонымен бірге, 5 000 грант – педагогикалық, 2 690 грант – ауыл шаруашылығы мен ветеринария және 3 000 грант медициналық мамандықтарды қамтыған.
ҚР Білім және ғылым министрлігінің мәліметінше, конкурстық негізде мемлекеттік тапсырыс берілетін жоғары оқу орындарының тізімі нақтыланды. Еліміздің 112 азаматтық жоғары оқу орыны арасында оқу гранттары 87 жоғары оқу орындарына бөлінді. Өткен жылы 64 оқу орны ғана қамтылған еді.
Биылғы оқу гранттарын алу конкурсына 59 677 талапкер қатысуда, олардың ішінде 47 342-сі – қазақ тілінде білім алуға (80 пайызға жуығы), 12 335 түлек орыс тілінде оқуға тапсырған.
Білім бәсекесіне қатысқандар арасында 2 208 «Алтын белгі» иегері, 303 колледж түлегі, 169 халықаралық және республикалық олимпиадалардың жүлдегері, 854 халықаралық және республикалық ғылыми жарыстардың жеңімпазы, 948 түрлі спорттық сайыстардың жүйріктері мен 9 Президенттік олимпиаданың жеңімпазы бар. Олар грантты алуда басымдыққа ие болды.
Сондай-ақ, конкурсқа І, ІІ топ мүгедектігі бар 363 адам, Қазақстан Республикасының азаматтығы жоқ қазақ ұлты өкілдерінен 1 053 адам және 492 ата-анасының қамқорлығынан айырылған балалар мен жетім балалар қатысуда. Бұл талапкерлерге квоталар белгіленген.
Азамат ЕСЕНЖОЛ