«Адам бүгін театрға ертең адам болып қалу үшін барады» деген канадалық режиссер Робер Лепаждың пікірімен толықтай келісуге болады. Себебі, сан түрлі өнердің басын қосқан театр әлемінен жан дүниемізді мазалайтын өмірлік сұрақтардың жауабын табатынымыз рас.
1961 жылы Халықаралық Театр институты Вена қаласында өткен IX конгресінде 27 наурызды «Халықаралық театр күні» (World Theatre Day) деп бекітті. Жыл сайын көктемнің алғашқы айында бұл мерекені Халықаралық Театр институты мен дүниежүзіндегі театр қауымдастықтары жоғары деңгейде атап өтеді. Аталмыш мереке біздің елордамызда да осымен үшінші рет дәстүрлі түрде тойлануда.
Конгресс-Холда актерлар қауымын төл мерекесімен құттықтаған Астана қаласы Мәдениет басқармасының басшысы Болат Мажағұлов елорда әкімі Иманғали Тасмағамбетовтің арнайы құттықтау хатын оқып, гүлшоғын табыстап, осы жылы ерен еңбегімен үздік танылған бірқатар театр саңлақтарын алғыс хатпен марапаттады. Бұл тізімде Қ.Қуанышбаев атындағы мемлекеттік академиялық Қазақ музыкалық драма театрының актрисасы Бақыт Исабекова, М.Горький атындағы мемлекеттік академиялық Орыс драма театрының актрисасы Наталья Матвеева, «Наз» би театрының актері Алмат Шәмшиев, «Жастар» театрының белді актері Азамат Есқұлов, «Қуыршақ» театрының жас актері Аманжол Темірханұлы мен «Терра» би театрының бишісі Ольга Тахирқызы бар.
Әшірбек Сығай бастаған театр өнерінің тарландары әріптестерін құттықтап, жас дарындардың мерекелік кешке арнайы дайындаған сахналық қойылымдарымен танысты.
«ЭКСПО-2017» актерлар көзқарасымен» тақырыбында әр театр ұжымы өзіндік қойылымдарын сахналады. М.Горький атындағы Орыс драма театрының актерлері Астанаға жаңа жастар театрының қажет екендігін, Қаллеки театрының ұжымы өз қойылымдары арқылы ұлттар достығы мен татулығын көрсетсе, «Қуыршақ» театры сахнада мың бұрала билей алатын алып қуыршақтарымен тек балаларды ғана емес, үлкендер қауымын да тәнті ете алатындарын көрсетті.
Тұрсынбек Қабатов бастаған «Әзіл әлемінің» жігіттері пародияларымен залды думанға бөледі. «Дала театрынан бастап, қазіргі заман және болашақтағы театр қандай болмақ?» деген идеяны сахналаған «Жастар» театры озық технологиялар санамызды қанша жауласа да, театр рухы өшпейтінін қалың көрерменге жеткізе білді.
Нұргүл АХАНҚЫЗЫ
