9-13 тамыз аралығында шайбалы хоккейден Президент Кубогі үшін халықаралық турнир жалауын көтереді.
Шайбалы хоккейден Қазақстан федерациясының бас директоры Юрий Зверевтің айтуынша, турнирге қатысатын бес команда анықталды. Олар елорданың «Барысы», Ресейдің «Югра» мен «СКА» хоккей клубтары, Өскеменнің «Қазцинк- Торпедо» командасы және Қазақстан ұлттық құрамасы. Бақталастар 4 күн бойы айналмалы жүйе бойынша өзара мықтыны анықтайды. Алғаш болып мұз айдынында «СКА» мен Қазақстан құрамасы күш сынасады. «Барыстың» бірінші қарсыласы – ресейлік «Югра».
«Барыс» хоккей клубының президенті Вадим Шақшақбаевтың сөзіне қарағанда, ойынның ең тартысты деген матчтары жанкүйерлер көп жиналуы үшін демалыс күндері болмақ. «Билеттердің сатылымы қарқынды екенін атап өту керек. Даярлықтың барлық қамы жасалды»,– деді ол.
