ҚР Ұлттық академиялық кітапханасында «Тарихтан тағылым» атты иллюстративті кітап көрмесі өз жұмысын бастады.
Жыл сайын дәстүрлі түрде ұйымдастырылатын бұл көрмеге биыл еліміз бойынша және
ЮНЕСКО көлемінде мерейтойлары аталып өтетін тарихи тұлғалар мен ақын-жазушылардың, қазақтан шыққан белгілі мемлекет және қоғам қайраткелерінің архив шежірелері, құжаттары, фотолары, еңбектері, кітаптары мен құнды туындылары қойылды.
Өскелең ұрпаққа қазақтан шыққан белгілі тұлғаларды, олардың тағылым жолын, туындыларын таныту, кітап оқу мәдениетін қалыптастыру, кітапхананың имиджін көтеруді мақсат еткен бұл көрме бес бөлімнен тұрады.
Бірінші бөлім – «Қазақ хандығына 560 жыл» деп аталады. Осыған орай, тақырыптық көрмеде 100-ден астам кітап және мерзімді басылым материалдары ұсынылған.
Екінші бөлім – «Ұлы Жеңіске 80 жыл». Аталған бөлімде әскери тақырыпқа қатысты кітаптардан бөлек, сұрапыл соғыстан сыр шертетін құжаттар беріліп отыр.
«Қазақстан Республикасының Конституциясына 30 жыл» тақырыбындағы үшінші және «Қазақстан халқы Ассамблеясына 30 жыл» тақырыбындағы төртінші бөлімдерде соңғы жылдары жарияланған баспа өнімдері, тың деректі материалдар қамтылған.
Бесінші жеке тұлғалардың мерейтойларына арналған «Тұғыры биік тұлғалар» тақырыбындағы бөлім. Оған биылғы мерейтой иелерінің өмірі мен шығармашылығы жайында жазылған 500-ден аса кітаптар, естеліктер, фото-суреттер, нақылсөздер мен дәйексөздер қойылған.
Көрме кітапхана оқырмандарына тұрақты түрде жыл бойы ұсынылады.
Дайындағандар Аманғали ҚАЛЖАНОВ, Шапағат ӘБДІР
