Елбасы «Нұрлы жол – болашаққа бастар жол» Жолдауында еліміздің экономикалық-әлеуметтік ахуалын әрі қарай дамытуға, іскерлік белсенділік пен жұмыспен қамтуды ынтыландыруға байланысты жаңа міндеттер жүктеді. Кезекті елдік құжат – экономиканың қозғалтқыш күші іспетті. Ал шағын және орта бизнесті дамытуға, қосымша инвестициялар тартуға, жұмыс орындарын құруға елордада 2001 жылдан бері жұмысын жүргізіп келе жатқан «Астана – жаңа қала» арнайы экономикалық әкімшілендіру аймағының қосар үлесі үлкен.
Жолдауда жүктеген міндеттерді орындау инновациялық индустрияландыру мен орта және шағын кәсіпкерлікті дамытуға тікелей байланысты екендігі белгілі. Астана болашақта әлемдегі ірі мегаполистердің қатарына қосылуға талпынып отыр. Ол үшін бас шаһар қай жағынан да озық, заманауи сұраныстарға лайықты шаһар болуы керек. Елорданы қалай көркейту керек, қандай жобаларды іске асыру қажеттігі «Астана – жаңа қала» арнайы экономикалық аймағы аясында ойластырылып, жүзеге асырылады. 2005 жылы құрылған Индустриалдық парк 2007 жылдан бастап осы АЭА-ның аумағына енгізілді. Ел экономикасын алға сүйрейтін серпінді жобалар осы өнеркәсіп аймағында іске асырылып жатыр. Бүгінде №1 Индустриалдық парк аумағында жалпы көлемі 173,6 млрд теңге инвестицияны құрайтын 50 жоба жүзеге асырылуда. Оның 21 нысаны 2009-2014 жылдар аралығында пайдалануға берілді. Ал 15 нысанда құрылыс-монтаж жұмыстары жүргізіліп жатса, 14 жоба бойынша жобалық-сметалық құжаттандыру процесі жүргізілуде. Бұл жобалар парк аумағының 90 пайызын алып жатыр. Осында ашылған нысандардың арқасында 2 мыңнан аса жұмыс орны құрылды. Ал 2015 жылы тағы 300 жаңа жұмыс орнын ашу көзделуде.
Елордадағы өнеркәсіптік жобалар, негізінен, осы №1 Индустриалдық паркте шоғырланған. Мұндағы кәсіпорындардың барлығы тың технологиялармен жұмыс істейді. Олар өндірген жобалардың сапасы да жоғары. Кәсіпорындардан бюджетке келетін пайда да айтарлықтай. Мысалы, биылдың өзінде №1 ИП аумағындағы өндіріс орындарынан бюджет қоржынына 3,3 млрд теңге көлемінде салық төленді. Осы жылы екі нысан пайдалануға берілді. Соның бірі – «Кама-Қазақстан» сауда үйі» ЖШС шинно-логистикалық кешен.
Мұндағы қойманың өткізгіштігі 1,5 млн автодөңгелекті құрайды. Екіншісі – «Казглавпродукт» ЖШС бөлшектеп өлшейтін желісі бар көліктік-логистикалық орталық. Өндірістің қуаттылығы, шамамен, айына 90 тонна өнім.
Заманауи технологиялармен жұмыс істеп жатқан жобалардың бір легі ретінде электрондық-оптикалық құрылғылар мен тепловизорлар шығаратын «Қазақстан ASELSAN Инжиниринг» ЖШС мен «Тау-Кен Алтын» аффинаж зауытын атап өтуге болады. Алдыңғы кәсіпорын былтыр құрылған, жобаның құны 7,8 млрд теңгені құрайды. Осы өндірісте 83 жаңа жұмыс орны ашылды. Өндіріс орындарының жоғары технологиялық құрылғылары, негізінен, қорғаныс өнеркәсібінде пайдалануға арналған.
Ал былтыр тұсауы кесілген Аффинаж зауытында 72 жұмыс орны құрылды. Жоба құны – 5,4 млрд теңге. Өндіріс орны алтын, күміс және басқа да бағалы металдарды италиялық технологиямен өңдеумен айналысады. Бұл кәсіпорын – еліміз бойынша жалғыз өндіріс орны.
Елбасының Жолдауында жұмыс істеп тұрған арнайы экономикалық аймақтарда инфрақұрылымдарды қалыптастыру жұмыстарын аяқтау мәселесі кеңінен айтылды. Астанадағы №1 Индустриалдық парк бастан-аяқ инженерлік желілермен қамтамасыз етілген. Жолдары төселген. Магистралдық жылу трассалары, су, кәріздік жүйелері жүргізілген.
Енді «Астана – жаңа қала» арнайы экономикалық аймағы жалпы аумағы 433 гектарды құрайтын №2 Индустриалдық парк құрылысын да қолға алды. Бүгінде оның техникалық-экономикалық негіздемесін әзірлеу бойынша жұмыстар жүргізіліп жатыр. Негіздемесі қолға тиіп, мемлекеттік сараптама қорытындысы шығарылғаннан кейін №2 Индустриалдық парктің жобалық-сметалық құжаттамасы әзірленіп, әрі қарай инфрақұрылымын салу шаруалары қолға алынатын болады.
Медер МӘСЕЛОВ,
«Астана – жаңа қала» АЭА әкімшілендіру басқармасының басшысы