ИНВЕСТИЦИЯЛАР АЛАҢЫНДАҒЫ МЫҚТЫ ОЙЫНШЫ
Кеше Қазақстан Республикасының Тұңғыш Президенті – Елбасының кітапханасында Мемлекет басшысы Нұрсұлтан Назарбаев индустрияландыру бағытына арналған кеңес өткізді. Кеңес барысында жалпыұлттық телекөпір арқылы Елбасы аймақтардағы бірқатар өндіріс ошақтарының жұмысымен танысты. Қазақстанның Еуразиялық экономикалық одақтың инвестициялық орталығына айналу мүмкіндігі мол. Басты мақсат та сол. Осылай мәлімдеген Мемлекет басшысы бұл ретте атқарылып отырған істерге тоқталды.
«Еліміздегі инвестициялық ахуал тартымды бола түсу үшін барлық күшімізді салып отырмыз. Менің мамыр айының аяғында Қытайға жасаған сапарымның қорытындысында экономикамызға тағы 10 миллиард доллар инвестиция құйылатын болды. Бұл инвестициялардың артында Тараз бен Шымкенттегі, Маңғыстау, Ақтөбе, Алматы облыстарындағы химиялық және мұнай-газ салаларын қамтитын жаңа кәсіпорындар тұр. Барлық әкімдер, министрліктер мен ведомстволар өз жұмыстарында осыны басшылыққа алулары керек. Өндіріс бейнесін инновациялық, ғылыми негізделген жобалар түбейгелі өзгертеді. Қазақстан осы жағынан бірқатар басымдықтарға ие. Бұл артықшылығымыз мемлекетімізді инвестициялар алаңында мықты ойыншыға айналдырып отыр» деді Нұрсұлтан Әбішұлы.
Шетелдік инвесторлар кеңесінде айтқандарын пысықтаған Елбасы геоэкономикалық тұрғыдан тиімді жағдайымыз, саяси тұрақтылығымыз, экономикалық өсуіміз, дамыған инфрақұрылымымыз, мемлекет дамуы стратегиясының айқындылығы инвесторларды елімізге тартуға септесіп, олардың ұтылмауына жағдай тудырады.
Нұрсұлтан Назарбаев сондай-ақ, Үдемелі индустриялық инновациялық даму бағдарламасының биылғы бірінші жартыжылдық қорытындыларын қамтыған Үкіметтің есебін тыңдады. Белгілі болғандай, осы кезеңде Индустрияландыру картасына енген 21 жоба іске қосылып, 2 мың тұрақты жұмыс орны ашылған. Екінші жартыжылдықта тағы 100-ге тарта жоба жүзеге асып, 8 мың адамның екі қолына жұмыс тимек.
Жалпыұлттық телекөпір арқылы өңірлердегі өндіріс ошақтарының өкілдері ел Президентіне есеп берді. Жұмыстарының әрі қарайғы бағыты жөнінде әңгімеледі. Олардың арасында Атыраудағы дуальдық оқытудың халықаралық стандарттарына сәйкес келетін мұнай-газ саласының кадрларын даярлау және қайта даярлау жөніндегі өңіраралық кәсіби орталығы, Алматыдағы индустриялық аймақ, Батыс Қазақстан облысындағы Ақсай индустриялық паркі, Ерейментаудағы қуаты 45 МВт өнеркәсіптік жел паркінің құрылысының басшылығы болды. Нұрсұлтан Назарбаев бірқатар жаңа кәсіпорындарды іске қосты. Атап айтсақ, кеше «Қорғас – Шығыс қақпасы» АЭА құрғақ порты және Семейдегі «Солтүстік-Шығыс-Оңтүстік» электр беру желілері өз жұмыстарын бастады.
Аманғали ШМИТҰЛЫ