Ел тынысы

Ірі қалалардың инженерлік желілері цифрлануда

Әрбір ірі қала бойынша жер учаскелерінің функционалдық интерактивті карталарын және коммуналдық желілердің схемаларын жасау жүріп жатыр, деп хабарлайды astana-akshamy.kz

Соңғы кездері қала құрылысы қызметінде тұрғын үйлер мен объектілерді ретсіз заңсыз салу, сондай-ақ еліміздің ірі елді мекендеріндегі инженерлік желілерге ойластырылмай жүктеме түсіру мәселесі өзекті боп тұр. Бұл қала құрылысы регламенттерінің сақталмауына және жер учаскелерін беру жүйесінің ашық болмауына байланысты болып тұр. Аумаққа құрылыс салуды сауатты басқару халықтың өмір сүру сапасын арттырады және құрылыс секторын жаңғыртады.

Осыған байланысты ел Президенті әрбір ірі қала бойынша жер учаскелерінің функционалдық интерактивті карталарын және коммуналдық желілердің схемаларын жасауды тапсырды. Бұл туралы 2022 жылғы 1 қыркүйектегі «Әділетті мемлекет. Біртұтас ұлт. Берекелі қоғам» атты Жолдауда айтылған.

Былтырғы 9 қазаннан бастап барлық нормативтік регламенттер күшіне енгеннен кейін жылжымайтын мүліктің бірыңғай мемлекеттік кадастры (ЖМБМК) іске қосылып, жер учаскелерінің функционалдық интерактивті карталары енгізіліп жатыр.

Коммуналдық желілер схемаларының функционалдық интерактивті карталары мемлекеттік қала құрылысы кадастрының ақпараттық жүйесі (бұдан әрі – МҚҚК ААЖ) арқылы қалыптастырылған. Бас жоспарлар мен егжей-тегжейлі жоспарлау жобалары (ЕТЖЖ), аэрофототүсірілімдер, орталық және жергілікті атқарушы органдардың инженерлік желілерінің деректері жиналып, МҚҚК ААЖ-ға енгізілді.

Сондай-ақ, Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы шеңберінде (Үкіметтің 2022 жылғы 23 қыркүйектегі № 736 қаулысы) еліміздің ірі қалаларында (Астана, Алматы, Шымкент, Ақтөбе және Қарағанды) инженерлік желілердің деректері дәлдікпен нақтыланады және цифрланады, олардың деңгейі орта есеппен 90%-ды құрайды.

Деректерді одан әрі автоматты түрде жаңарту табиғи монополиялар субъектілерінің инженерлік желілердің техникалық сипаттамалары мен бос қуаттылықтарының цифрлық деректерін беруі, барлық деңгейдегі қала құрылысы жобаларына бірыңғай қала құрылысы сараптамасын енгізу, сондай-ақ МҚҚК ААЖ-ға бастапқы деректерді енгізу және атқарушылық түсіріліммен қоса объектілерді пайдалануға қабылдау актілерін есепке алу есебінен жүзеге асырылады.

Осылайша, бұл тапсырманы іске асырудың арқасында жер учаскелерінің қалыптастырылған интерактивті карталары жер учаскелерін табуға, олардың функционалдық мақсатын, инфрақұрылымдық қамтылуын үйден шықпай-ақ тануға мүмкіндік беретін жаңа ыңғайлы құрал болады. Сондай-ақ инженерлік коммуникациялармен қамтамасыз етілуін ескере отырып және қала құрылысы регламенттеріне қатаң сәйкестікте ірі елді мекендердің аумағына құрылыс салуды неғұрлым ұтымды жүзеге асыруға мүмкіндік береді.

Тағыда

admin

«Астана ақшамы» газеті

Ұқсас жаңалықтар

Back to top button