Қазақстан Премьер-Министрі Кәрім Мәсімов Еуропа және Азия елдері саммитіне (АСЕМ) қатысу үшін Моңғолияға келді. К.Мәсімов сапарын Елбасының тапсырмасы бойынша Моңғолияның Баян-Өлгей аймағының Өлгей қаласынан бастап, қазақ диаспорасының өкілдерімен кездесті. Сондай-ақ, Премьер-Министр Ұлан-Батырға келіп, Моңғолияның тарихи-мәдени ескерткіштерімен танысты.
Өлгей қаласында К.Мәсімов аймақтық өлкетану мұражайының экспозициясымен танысты.
Аймақтық өлкетану мұражайы 1948 жылы құрылды. Мұнда 5200-ден астам жәдігерлер сақтаулы.
Премьер-Министр Моңғолияның ең ірі қазақ диаспорасының өкілдерімен кездесті.
Өлгей қаласында 90 мыңнан астам адам тұрады, оның 88,7% – этникалық қазақтар.
К.Мәсімов 2014 жылы ашылған №1 қазақ мектебін аралады. Қазақстан Үкіметі мектепті оқу құралдарымен және оқулықтармен қамтамасыз етеді.
ҚР Премьер-Министрі Өлгей қ. аймақтық музыкалық-драма театрына барып, шетелдегі қазақ өнерінің даму барысын көрді.
Түстен кейін ҚР Премьер-Министрі Ұлан-Батырға келіп, «Шыңғысхан мүсіні» мұражайын аралап, Тоныкөк көне түркі жазба ескерткішін көрді.
Бүгін Премьер-Министр АСЕМ саммитінің жұмысына қатысады.
