Жақында М.Өтемісұлы атындағы Оқушылар сарайында балалар мен жасөспірімдер арасында каратэ-до бойынша I республикалық чемпионат өтті.
Спорттық додаға Астана және Алматы қалаларының, барлық облыстардың құрама командалары қатысты. Чемпионатты ұйымдастырушы – Астана қаласының каратэ-до WKF және дәстүрлі күрес өнері федерациясы. Чемпионатқа Қазақстан Республикасының Мәдениет және спорт министрлігі, Қазақстан Республикасының Каратэ-до бойынша ұлттық федерациясы, Астана қаласының туризм, дене тәрбиесі және спорт басқармасы, Астана қаласының ІІД есірткі бизнесімен күрес басқармасы қолдау жасады.
Балалар мен жасөспірімдер арасында салауатты тұрмыс салтын насихаттауды, нашақорлық пен балалар арасындағы қылмыстың алдын алуды мақсат тұтатын чемпионатқа қатысушылардың жасы 10-нан 13-ке дейін деп белгіленді. Спорт додасына үш жүз төрт бала қатысты. Екі күнге созылған жарыс кезінде олар басты жүлделерді жеңіп алуға бар күштерін салды және де жалпыкомандалық ұпай саны бойынша өз ұжымдарын алға шығаруға тырысты. Осылайша чемпионатта Байқоңыр қаласының командасы жеңіске жетті. Елорданың құрамасы екінші орынды, ал Оңтүстік Қазақстан облысы үшінші орынды місе тұтты.
Лаула АСҚАР,
Қазақстан Журналистер одағының мүшесі
