Өткен жазда Ұлттық кәсіпкерлер палатасы мен «Қазақстан Халық банкі» АҚ арасында ынтымақтастық жөнінде меморандумға қол қойылды. 6-13 тамыз аралығында, бір апта ішінде еліміздің ірі қалаларында 22 кеңес беру орталығы ашылып, кәсіпкерлерге түрлі тегін қызметтер көрсетіле бастады. Мәселен, сол орталықтарда «Бизнестің жол картасы – 2020», «Өңдеуші өнеркәсіп саласындағы шағын және орта бизнес субъектілерін қолдау», «Жұмыспен қамтудың жол картасы – 2020», «Агробизнес – 2020» секілді мемлекеттік бағдарламалар бойынша түсіндірме жұмыстары жүргізіліп келеді. Жақында Астана қаласының кәсіпкерлер палатасы, «Қазақстан Халық банкі» АҚ және «Даму» кәсіпкерлерді қолдау қорының ұйымдастыруымен «Кәсіпкер күні» шарасы өткізілді. Онда осы ұйымдардың мамандары кәсіпкерлерге ұсынып отырған жобалары жайында әңгімеледі.
Қазақстан Халық банкі шағын және орта бизнесті қолдауға арналған несиелеу бағдарламаларын ұсынып отыр. «Халық кәсіпкер», «Жеделдетілген халық кәсіпкер», «Халық бизнес старт», «Бизнес medium», «Бизнес келісімшарт», «Бизнес депозит», «Овердрафт (кәсіпорындарды қысқа мерзімдік несиелеу бағдарламасы)», «Халық-агро» деп аталатын бұл несиелер туралы банк мамандары жан-жақты ақпарат беріп, буклеттерді таратты.
– «Халық бизнес старт» бағдарламасы өз ісін енді ғана бастаған кәсіпкерлерге арналады. Яғни, кәсіпкер ретінде тіркелгеніне бір жыл бола қоймаған заңды тұлғаларға ұсынылады. Бұл топқа жеке кәсіпкерлер мен жауапкершілігі шектеулі серіктестіктер жатады. 1,5 млн теңгеден 20 млн теңгеге дейін қаржыландыру сомасы 3 айдан 60 айға дейін мерзімге беріледі. Кәсіпкерлер оның 30 пайызын депозитке кепілге салады, ал 70 пайызына «Даму» қоры кепілдік береді. Мысалы, кәсіпкер 10 млн теңгені қажет етсе, депозитында жатқан 3 млн теңге несие алуға әбден жеткілікті. Бұл жағдайда жылжымайтын мүлікті кепілге салудың керегі жоқ. Биыл іске қосылған бұл бағдарламаға кәсіпкерлер үлкен қызығушылық танытуда. Бірақ, «Халық бизнес старт» арқылы несие алғысы келетіндер алдымен «Бизнес кеңесші» бағдарламасы бойынша оқудан өтіп, сауатты бизнес жоспар ұсынулары шарт, – дейді банктің Астана өңірлік филиалының шағын бизнеске сату қызметін ұсыну орталығының басшысы Анжелика Қайыржанова.
«Даму» кәсіпкерлерді қолдау қорының менеджері Серік Досалиевтің айтуынша, қор «Бизнестің жол картасы – 2020» бағдарламасы шеңберінде кәсіпкерлерді кешенді қолдау ісін жүргізіп келеді. Атап айтсақ, субсидиялау және кепілдендіру бағдарламалары бойынша көмек беріледі. Сондай-ақ, «Іскерлік байланыстар» жобасы арқылы Назарбаев Университеті мен шетелдерде оқуға құзыреттілікті жоғарылату қызметін көрсетеді. «Субсидиялауға 14 пайыздан аспайтын несиелер жатады. Оның 7 пайызын несие алушы, қалғанын «Даму» қоры төлейді. Несие 3 жылға алынады, алайда кәсіпкерлер оны 10 жылға ұзарту мүмкіндігіне ие» дейді ол. Қосымша ақпаратты damu.kz сайтынан және Қажымұқан көшесі, 8а мекенжайында орналасқан Кәсіпкерлерге қызмет көрсету орталығына келіп алуға болады.
Толық ақпарат алу үшін «Қазақстан Халық Банкі» АҚ АӨФ Шағын және орта бизнеске сату орталығының +7 717 2 591 150 және +7 7172 591 183 байланыс телефондарына хабарласуға болады.
Аманғали ШМИТҰЛЫ
