Елімізде, коронавируспен емделіп жатқан 114 баланың үшеуінен кавасаки синдромы анықталған. Олар Алматы, Нұр-Сұлтан, Петропавл қалаларында емделіп жатыр. Мамандардың мәліметінше, кавасаки дегеніміз инфекциялық аурулардың салдарынан жүрек қан тамырларының қабынуы. Яғни, негізгі қоздырғышы вирустық және бактериялық аурулар.
Кавасаки синдром белгілері инфекциялық аурумен науқастанғанда немесе арада 3-4 ай өткенде байқалады. Мамандар аурудың бұл түріне коронавирустің ықпалы бар екенін жоққа шығармайды. Әсіресе, балалар арасында жиі кездесуі мүмкін. Бұл туралы Нұр-Сұлтан қаласының №3 көпбейінді қалалық балалар ауруханасының инфекционист-дәрігері Жанар Бөкенова былай дейді.
– Ең бірінші, температураның өте жоғары болып, баланың денесінде бөртпелер пайда болады. Бетінде алақандарында, табандарында. Аяқтары ісініп, көзі қызаруы мүмкін. Бұлар – кавасакидің белгілері. Дереу дәрігерге қаралу керек.
Балалар арасында кеңінен етек алып келе жатқан ауру туралы әлем дабыл қағуда. Мысалы коронавирустың ошағын енді ауыздықтаған Италия елі кавасаки синдромымен түскен балалардың биыл үш есе көбейгенін мәлімдеген. Ғалымдардың кейбірі коронавирус инфекциясы ересектерде тромбоэмболия тудыруы мүмкін, ал балаларда кавасаки синдромын өршітеді деген болжам жасаған. Себебі Еуропа және АҚШ-та аталмыш синдроммен ауырған балаларда ковид-19 тест нәтижесі оң болып шыққан. Кавасаки синдромын көп жағдайда дәрігерлер дұрыс анықтай алмайды. Мәселен, Марлидің демалуы өте нашарлап, дене қызуы 39 градусты көрсеткенде дәрігерлер мұны жәй суық тию деп бірнеше күн күтулерін сұраған. Бірақ, Марлидің жағдайы өте нашарлап, тамағында жұдырықтай ісік пайда болады. Тілі де қабынып, жүрегі айнып, денесін бөртпе басады. Осыдан кейін ғана дәрігерлер диагнозын қойып, емдеу шараларына бірден кіріседі. Және 6 апта бойы баланы үздіксіз емдеумен болған. Бұл індеттің симптомдары тым көп. Аяқтың ісінуі, көздің қызаруы, диарея, құсу, дене қызуы көтеріліп, әлсіздік пен аяқ-қолда аллергия сияқты бөртпенің пайда болуы – басты белгілері. Жүрек соғысы да жиілей түседі. Мұндай жағдайда балалардың орта және кіші артериялары зақымдалады. Буындар қабынып, егер уақытылы емделмесе инфарктқа дейін ұласуы мүмкін дейді мамандар. Сондай-ақ көбінесе 5 жасқа дейінгі балалардың шалдығатыны да белгілі болды. Ресми дерек бойынша, елімізде бұл дерт жыл басынан бері 3 баладан анықталған. Олар: Нұр-Сұлтан, Алматы және Петропавл қалаларының тұрғындары. Сонымен қатар Ақтөбеде облыстық балалар ауруханасында жатқан 5 және 15 жастағы екі баладан да кавасаки ауруына ұқсас белгілер анықталыпты. Денсаулық сақтау министірлігінің ресми өкілі Бағдат Қожахметов бұл өте сирек кездесетін ауру екенін айтты. Әзірше ауырған балалар туралы толық ақпарат жоқ. Алайда Ал Нұр-Сұлтанда ауырып жатқан баланың жағдайын дәрігерлер орташа деп бағалаған.
