Кеше «Қазмедиа» орталығында «КАZsport» мемлекеттік тұңғыш спорт телеарнасының ашылу рәсімі өтті.
Салтанатты шараға белгілі қазақстандық спортшылар, Олимпиада ойындарының чемпиондары, халықаралық және республикалық спорт жарыстарының жеңімпаздары, спорт ардагерлері қатысты.
Телеарнаның алауы жағылар сәтте сахнаға қазақ спортының төрт буынынан өкілдер шығарылды. Алдыңғы буын өкілі ретінде грек-рим күресінен 1980 жылғы Мәскеу олимпиадасының чемпионы Жақсылық Үшкемпіров сөз сөйледі. Балуанмен бірге бүгінгі Мәжіліс депутаты, 2000 жылғы Сидней олимпиадасында чемпион атанған Ольга Шишигина, екі дүркін олимпиада чемпионы Илья Ильин, шахматтан оқушылар арасында төрт дүркін әлем чемпионы Бибісара Асаубаевалар телеарна алауын тұтатты, ыстық лебіздерін білдірді.
Шара аяқталысымен «КАZsport» арнасының басшысы Диас Ахметшәріп журналистер сұрағына жауап берді. Оның айтуынша, «КАZsport» телеарнасының таралым ауқымы қазақстандық көрермендердің 70 пайызын қамтитын болады. Сөзін жалғай келе ол: «Арна тәулiгiне 20 сағат хабар таратады және эфирлiк кестемiзге сай Қазақстанның iшкi жарыстарымен қатар, шетелдiк iрi додаларды да тiкелей эфирде трансляциялаймыз. Ол жалпы бағдарламалардың 70 пайызын құрайтын болады, қалған 20 пайызын – жаңалықтар, iшкi өнiм, бағдарламалар, 10 пайызын деректi фильмдер құрайды» деді.
Телеарнадағы бағдарламалардың 50 пайызы – орыс, 50 пайызы қазақ тілінде жарық көреді.
Ербол ЖАНАТ
