«КЕДЕРГІСІЗ КЕЛЕШЕК» МҮМКІНДІКТЕРІ
«Нұр Отан» партиясының мүмкіндігі шектеулі жандардың оқшау өміріне өзгеріс әкеліп, олардың белсенділігін арттыруға серпіліс берген «Кедергісіз келешек» жобасы қанат қақты.
Ол негізінен мүгедектерді тұрақты жұмысқа тұрғызу, мүмкіндігі шектеулі адамдарға кедергісі жоқ жағдай жасау, қоғам мен бизнестің назарын мүгедектердің мәселесіне аударуға бағытталған ақпараттандыру жұмысын күшейту, мүгедектер құқығы аяқасты болмайтынын құқықтық алаң құруды көздейтін негізгі төрт бағыт бойынша жүзеге асырылады.
Бұл күнде «Нұр Отанның» алғашқы партиялық ұйымдары құрылған мекемелерде 14,5 мыңға жуық мүмкіндігі шектеулі жандар еңбек етеді. Алдағы уақытта ондағы мүгедектердің санын белгіленген 3% квотаға дейін жеткізу жоспарланып отыр.
Әлеуметтік және көлік инфрақұрылымдардың 83 пайызға (15,5 мың) жуығы мүгедектерге қолайлы емес екені анықталды. «Нұр Отан» партиясының аймақтық филиалдары ол жақтағы нысандарды құжаттау мен бейімдеу мониторингі жұмысын бастап кетті. Елімізде тұрып жатқан 630 мыңға жуық мүгедектің еңбекке жарамды жастағыларының саны 405 мың екен. Олардың 20 пайызынан астамы ғана, яғни 83 мыңы жұмыспен қамтылған. Ал 17 мың мүгедектің жұмыс істеуге ынтасы бар.
Айгүл УАЙСОВА