Сарыарқа ауданының абаттандыру және даму мәселелері бойынша жиын өтіп, күн тәртібінде келелі мәселелер талқыланды. Бұл туралы мәслихат төрағасы Ерлан Каналимов мәлім етті.
«Биылғы жылы 255 аула аумағында, сондай-ақ «Көктал» саябағында және оған іргелес орналасқан скверлерде жөндеу-қалпына келтіру жұмыстары жүргізілді. Ауданның көше желісінің жалпы ұзындығы – 314 шақырым. Оның 268 көшесінде (284 км, 93%) асфальт жабыны бар, ал 47 көшесінде (18 км, 7%) асфальт төселмеген» деп жазды Е.Каналимов әлеужелідегі парақшасында.
Ол ауданда жедел шешуді қажет ететін мынадай мәселелерді атап айтты: су құбырлары желілерінің қанағаттанарлықсыз жағдайы; кәріз жүйесінің тозуы; электр беру желілерінің ескіруі; кабельдік желілердің жұмысына қатысты ақаулар; қоқыс шығаруды, оның ішінде құрылыс қалдықтарын шығару жүйесін оңтайландыру қажеттілігі; контейнерлік алаңдарды жаңғырту; ауданның сәндік жарықтандыруы үшін бірыңғай формат пен жарық түс гаммасын әзірлеу. «Барлық аталған мәселелерді жан-жақты зерделеп, ауданның әлеуметтік-экономикалық даму жоспарларына енгізу қажет» деп сөзін түйіндеді мәслихат төрағасы.
