Кемел келешектің кепілі
Елбасы Н.Назарбаевтың тәуелсіздік күні қарсаңында жарық көрген «Қазақстан — 2050» стратегиясы барша қазақстандықтардың, ұлтжанды азаматтардың назарынан тыс қалмады, барлығымызға айрықша жауапкершілік жүктелді. Бұл бағдарлама — Қазақстанның өркендеуіндегі жаңа кезеңнің бағдарламасы.
Елбасының салиқалы саясаты, іскерлігі мен көрегендігінің арқасында осыдан 15 жыл бұрын қабылданған «Қазақстан – 2030» бағдарламасын жедел қарқынмен жүзеге асырдық. Атқарылған игі істердің нәтижесінде мол табысқа қол жеткізіп, әлемге танылдық, дүниежүзі мойындаған саяси іргесі нық қаланған мемлекетке айналдық, алға қойған мақсаттарымызға қол жеткіздік.
Елбасының «Қазақстан – 2030» стратегиясында басымдылықтың бірі – білім саласы бұл бағдарламада да назардан тыс қалмады. Елбасының арқасында жастарымыздың білімге деген құштарлығы артып, әлем танып, жер көруіне мүмкіндіктер алды. Өз сөзінде Н.Назарбаев «ХХІ ғасыр –қазақтың алтын ғасыры» деп, бірнеше рет қайталап айтты. Жаңа ғасырмен тұспа-тұс 2000 жылы Астанада «Басқару колледжі» бой көтерді. 8 түрлі мамандық бойынша білім жетілдіруге бағытталған білім ордасы жыл сайын тұғырын тереңдете түсуде. Оқушылар мен оқытушылар саны артып, заман талабына сай жаңа мамандықтар қосылды.
Бүгінгі таңда Елбасының талабына сай, қоғамға қажетті деп танылған12 түрлі мамандық иесін, әсіресе, техникалық бағытта білікті маман дайындаудамыз. Былтырғы оқу жылында «Электр жабдықтау», ал биылғы оқу жылында «Радиоэлектроника және байланыс» мамандығы ашылды.Осылайша, Елбасы тапсырмаларына өз үлесімізді қосудамыз.
Жолдаудың «Жаңа қазақстандық патриотизм – біздің көпұлтты және көп конфессиялы қоғамымыз табысының негізгі» аталатын бөлімінде көрсетілгендей, патриоттық тәрбиені негізге ала отырып, 2065 студент дайындаудамыз. Астана қаласының білім саласы бойынша айрықша орынға ие колледжімізге биыл 936 студент қабылданды. Әрине, бұл – біз үшін үлкен қуаныш. Астана қаласы бойынша студент қабылдау көрсеткіші жөнінен биыл да алдыңғы орындамыз. Қазақстан көпұлтты мемлекет болғандықтан бізде оқыту орыс және қазақ тілдерінде жүргізіледі.
Жыл сайын колледжде ғылыми-тәжірибелік конференциялар өткізіліп тұрады. Биыл тұңғыш рет директордың ғылыми-инновация жөніндегі орынбасары Ләззат Шәріпханқызының басшылығымен республика көлемінде ғылыми-тәжірибелік конференция өткізіліп, оған Көкшетау, Балқаш, Қарағанды қалаларынан оқушылар келіп қатысты. Әскери-патриоттық тәрбие бойынша колледж білім басқармасы ұйымдастыратын қалалық іс-шараларға үнемі қатысып, жыл сайын жүлделі орындарға ие болады. Осы оқу жылында хор, би, ұлт аспаптар үйірмелері ашылып, оқушылардың жан-жақты дамуына жағдай жасалды. Елбасының «Қазақ қазақпен қазақша сөйлессін» деген қанатты сөзіне ерекше мән беріліп, колледжде осы сөзді ұстанып, оқушылардан ұлтымыздың ана тілінде басымырақ сөйлеуіне көңіл бөліп келеміз. Мемлекет жастар саясатын қолдап, оларға зор мүмкіндіктер беруде. Жас ұрпақ Елбасы үмітін ақтап, еліміздің ертеңіне сеніммен қарай алатын саналы да білімді болып өсіп, ел тұтқасын берік ұстайтын азаматтар болса екен деймін.
Раушан ТҰРЛЫБЕКҚЫЗЫ,
Астана қаласы Басқару колледжі директорының тәрбие ісі
жөніндегі орынбасары