Кениядан келгендер шаң қаптырды
Көпшілікті бірлікке бастайтын бұқаралық спорттың бірі – марафон. Сенбі күні Астанада дәстүрлі халықаралық «Astana Marathon-2018» жарысы салтанат құрды. Думанды доданы елорда әкімі Бақыт Сұлтановтың өзі бастап берді.
Астана асуын бағындыруға еліміздің түкпір-түкпірінен және шет мемлекеттерден қатысушылар арнайы келді. Атап айтсақ, Германия, Ресей, Жапония, Италия, Өзбекстан, БАӘ, Швеция, Оңтүстік Корея, Ұлыбритания, АҚШ, Қырғызстан, Франция, Түркия, Австралия, Кения, Грузия, Люксембург және Испания марафоншылары сынға түсті.
Жарыс жолына 4661 адам шықты. Оның ішінде 830 адам марафонның мерейлі межесі – 42,2 километрге жүгіруге ниет танытса, 3831 адам қысқа қашықтық – 10 километрді қолай көріпті. Бірақ бұлардың бәрі өз шақырымдарын толық жүгіріп шыға алмады. Ең ұзаққа 672 адам жүгірсе, 10 километрді 2895 адам еңсерді.
Сонымен «ЕХРО-2018» көрме аумағынан басталған жарыстың мәресін бірінші болып Кениядан келген желаяқтар кесті. 42,2 шақырымды 2 сағат 17 минут 57 секундта артта қалдырған Эрик Керинг үздік болды. Екінші орынды алған Роберт Гаито да – кениялық. Үшінші болып қазақ Әмір Байтуқанов келді.
Әйелдер арасында абсолютті чемпион болған да – кениялық. Оның есімі – Салина Джебет. Екінші орын – соның отандасы Люси Ндунгуға тиесілі. Үшінші – қырғызстандық Юлия Андреева.
Бас жүлдеге 905000 теңге, кез келген бағытқа Air Astana билеті, Astana Marathon символикасымен Amir Watches эксклюзивті сағаттары табысталды.
Ал 10 км қашықтықта тағы да сол кениялықтар ешкімді ілестірмеді. Жоғарыдағыдай бірінші және екінші орындарға жайғасты: ерлерден Шадрак Коеч пен Кеннет Ротич, әйелдерден Норах Джеруто мен Дэйзи Джемкемей. Ал үшінші орында – өзіміздің азаматтар Алексей Гусаров пен Светлана Саунина.
Бұған қоса, жас ерекшеліктеріне қарай жеңімпаздар анықталды. Оның көбісі – қазақстандықтар. Бірақ бұл марафон алдына жан салмаған Кениядан келген желаяқтармен есте қалды. Сондықтан үшінші келгендердің нәтижесі алтынға пара-пар болды деуге болады.