ҚР Ұлттық музейінде «Орыс кескіндеме өнерінің төрт ғасыры» атты көрме өтуде. Мұнда Ресей суретшілер одағы мен «РОСИЗО» Мемлекеттік музей-көрме орталығы, Тверь облыстық сурет галереясы, Иваново облыстық көркемсурет музейі және Серпухов тарихи-көркемсурет музейінің бірлескен бірегей экспозициясы ұсынылып отыр.
Көрмеге орыс реалистік мектебі классиктерінің, орыс авангардының әлемге танымал хас шеберлері мен соцреализм суретшілерінің 90-нан астам жұмыстары қойылған. Келушілер А.Венециановтың, В.Тропининнің, С.Щедриннің сирек көрсетілетін туындыларымен, тарихи және эпикалық сипаттағы картиналардың шебері И.Репин, В.Суриков, В.Верещагин, В.Поленов сынды белгілі орыс суретшілерінің шығармаларымен таныса алады. Сонымен қатар, И.Айвазовский, А.Саврасов, И.Левитан, С.Жуковский сынды орыстың таңғажайып табиғатын асқан сезімталдықпен жырлаған пейзаж жанры үздіктерінің жұмыстарын көркемсурет жинағының ерекше құндылығы ретінде атап өтуге болады. Социалистік өнер шығармалары ретінде А.Корзухиннің, Маковскийлердің, Н.Ярошенконың жұмыстары қойылған. Оған қоса, В.Брайнин, Т. Назаренко, И.Старженецкая, Н.Нестерова сияқты қазіргі заманғы орыс суретшілері мен кескіндеме өнерінің басқа да белгілі тұлғалары ұсынған тамаша еңбектермен таныса аласыз. Көрменің панорамалық шолуын Г.Мызниковтың, В.Калининнің, А.Атахановтың жұмыстары аяқтайды.
«Кенеп бетіне түсірілген кескіндеме өнері арқылы Империялық Ресей, Кеңестік Ресей, Ресей Федерациясының бүкіл тарихын көруге болады» дейді ҚР Ұлттық музейінің заманауи мұражай бөлімінің жетекшісі Роза Әбенова. Көрме 14 қыркүйекке дейін жалғасады.
Еркежан СӘТІМБЕК
