Биыл Байқоңыр ауданының 34 тұрғын үй кешеніне сәулеттік-көркемдік жарықтандыру жасалды.
Архитектуралық және көркемдік сипаттағы жарық көздерін қолдану арқылы ғимараттардың немесе қоғамдық кеңістіктердің көрінісін эстетикалық тұрғыдан жақсарту мен ерекшелігін айқындауға бағытталған жарықтандыру түрі қаланың келбетіне сән беріп қана қоймай, түнгі уақытта ғимараттар мен тұрғын үй аумақтарын жарықтандырып тұрады. Сол себепті бұл жарықтық дизайнның ерекше бағыты.
Байқоңыр ауданында жалпы сәулеттік-көркемдік жарықтандырумен жабдықталған 132 нысан бар, оның ішінде 110 көппәтерлі тұрғын үй кешені, 8 білім беру нысаны, 14 басқа да нысандар, атап айтсақ, мешіт, шіркеу, қоғамдық кеңістіктер жарықтандырылды.
Өткен жылы аталған бағыт бойынша 16 тұрғын үй кешенінде осындай сәулеттік-көркемдік жарықтандыру жұмысы жүргізілген болатын. Ағымдағы жылы осы ауданда 20 көпқабатты тұрғын үй кешенінде жаңадан сәулеттік-көркемдік жарықтандыру жұмысы жүргізілді.
Сонымен қатар Республика даңғылындағы 14 тұрғын үй кешеніндегі жарықтандыруларға жөндеу-қалпына келтіру жұмысы жүргізіліп, қайта жаңартылды. Нәтижесінде биыл барлығы 34 тұрғын үй кешені сәулеттік жарықтандырылып, жаңа келбетке ие болды.
Сәулеттік-көркемдік жарықтандыру қалаларда және қоғамдық орындарда қала тұрғындарының өмір сүру сапасын арттыруға, архитектуралық әсемдікті көрсетіп, кеңістіктің эстетикалық әсерін күшейтуге мүмкіндік береді.
Гүлбаршын ӨКЕШҚЫЗЫ
