Бас қалада Мемлекеттік рәміздердің 30 жылдығына арналған «Көк аспаным – көк туым» мерекелік гала-концерті өтті. Кешті Р.Бағланова атындағы «Қазақконцерт» мемлекеттік концерттік ұйымы ұсынды.
Мерекелік концертке арнайы қатысқан Мемлекеттік елтаңбаның авторы, белгілі сәулетші Жандарбек Мәлібеков жиналған қауымды мерекемен құттықтап, ұйымдастырушыларға өзінің алғысын білдірді.
Концерттің басты ерекшелігі – жанрлық сан алуандығы. Бұл кеште классикалық музыка, эстрада мен ұлттық өнер, мюзикл театрының шығармашылығы жақсы үйлесім тапты. Концертте Роза Рымбаева, Ерлан Рысқали, Азамат Жылтыркөзов, Медет Шотабаев, Ардақ Балажанова, Айзада Қапонова, Гүлсім Мырзабекова, Күнсұлу Түрікпен, Асқар Мұқият, Әміре, Әлібек Әлмадиев, Рухия Байдүкенова, Азат Мәлік, Салтанат Меңдіғалиева, Біржан Айтахметов, Дидар Әбдухалық, Әйгерім Алтынбек, T&Y дуэті өнерін ортаға салды. Сондай-ақ көрермендер Қазақ мемлекеттік симфониялық оркестрі, «Астана сазы» қазақ фольклорлық ансамблі, «Forte Trio» мемлекеттік триосы, «Astana Musical» мемлекеттік театры мен «Saz&Soul» тобының өнерін тамашалады. Концерт соңында «Қазақконцерт» басшысы Ақтоты Райымқұлова рәміздердің 30 жылдығына арналған мерекелік іс-шаралар алдағы уақытта жалғасын табатынын айтты.
Баян АСЫЛБЕКОВА
