Көк түріктерінің қағандығы
Әнес САРАЙ
Сонымен Гаочан мен Бэйтин аралығынан Ту-ше-ши, Ту-цзюе-ши -Түркеш мемлекеттік құрылымының сұлбасы шаң береді. Олардың табан тіреген байырғы орындарын тастап, батысқа жылжып, бес дулудың арасынан шығуы 634 жылғы Батыс Түріктің Тона қағанының Бесбалыққа тап беріп, Шығыс Түрік қағаны Шорағаның (Чулоху) ұлы Ашина Шэрдің ұлысын тартып алып, өзін Қытайға қууымен тікелей байланысты болса керек. Тона қаған 635 жылы өзіне қарасты елді «он оққа» бөлгенде, түркештер осы қауымның қатарынан табылды.
Түркештің үш тайпасы анық белгілі: сақал, мохэ (бага) және әліш. Л.Гумилев бұл тайпаларды мукри, абар қауымымен үнемі байланыстыра сөйлейді. Онысында жан бар сияқты. Түркештер бас ордасын тіккен Суябтың батысында Мерке елді-мекені пайда болды. Мерке, мекірен есімі – мукри тайпасымен байланысты болуы ақылға қонады. Ұлы жүз шежіресінің ескілікті нұсқаларының бірінде Мекреннен Жалайырды таратады. Ал, Сақалды – үйсін шежіресі басындағы Асақал – Абақпен, әліш әлде алашты «Қорқыт – Ата кітабының» назарына іліккен Ала Үйсінмен сабақтастырып, Түркеш көші із-түзсіз жоғалмағанын түсінуге септеседі.
Дулу (дулат). Дулу Батыс Түрік қағандығында кең мағынада қолданылады. Дулу бір тайпаның аты емес, бір одаққа біріккен бес тайпаның ортақ атауы. Жеке тайпаның аты ретінде Дулу есімі кезікпейді. Сондықтан «Дулу – әулет атауы» деп қабылдауымызға негіз бар. Ежелгі Қытай деректемелерінде кезігетін Ду, Дулу әулеті және кейінгі дулат тайпасының тарихы «Көнеліктер» атты еңбегіміздің «Дулат» тарауында арнайы баяндалды. Сондықтан аталмыш қауымның әргі-бергі өткен-кеткеніне сөз шығындамай, зерттеу назарынан тыс қалған тұстарына тоқталмақпыз.
Қытай жылнамаларында «бес дулудың» қалыптасуы туралы ләм-мим дерек жоқ. Тарих сорабтарынан білетініміз: 487 жылы Афучжило Жужаннан бөлініп, Тұрпан – Тарбағатай арасына көшіп келген 12 тайпаның арасында дулу қауымының болғаны. Осы өңірде отырып дулу байырғы Үйсін мемлекеті жеріне иелік етті. Бұл өңірде көшіп-қонып жүрген іргелі тайпаның бірі Үйсіндер құрамында болған чеч-жун қауымы еді. Солармен еншілес болды. Ал дулудың құрамына енген өзге үш тайпа жаныс, чумукунь, түркеш қауымдарының дулуға қосылған кездері шамамен белгілі. Түрік қағандығы құрылғанға дейін дулу тайпалық бектік құрылым қалпында өмір сүрген сияқты. Өзге тайпалар кеп қосылғанда бектіктің не билеуші әулеттің аты оларға да жамалған. Ал дулу әулетінің төл жұрты – хулу-у, яки, «ұлы ұрық» атанды. Батыс Түрік қағаны Ашина Хэлудің «ұлы ұрыққа» қыз беруі – оның бес дулу арасындағы салмағын айқындай түседі. Батыс Түрік қағандығы мен Түркеш заманында жаныстардың жеке тайпа ретінде көзге түсуі өзге дулаттар «ұлы ұрықтың» құрамында болды деп түйіндеуімізге жол ашады. Бұл дулаттардың жеке тайпаларға жіктеліп үлгермеген кезі болуы мүмкін.
Алайда, Түркеш қағандығының тарихына тереңірек үңілу – бұл орайда тосындау ой күрмеуге мұрындық болды. Шу мен Сырдың арасын жайлаған қара түркеш арасынан шыққан әйгілі қағанды қытай жылнамалары Сулу деп әліптеген. Зерттеушілер осылай атап, жазып келеді. А.Г.Кляшторный ғана оның түрікше аталуы Сұлұқ не Сүлік болуы мүмкіндігіне мән берді. Шынында да, Түрік қағандарының бірде-бірінің есімін дұрыс жазбаған қытай жылнамаларының Сулудың атын әліптеуде жаңсақтық жібермеді деуге кім кепіл бола алғандай. Сулудың түрікше дұрыс дыбысталуы Сиық немесе Сиқым болуы да ғажап емес. Ол – қара түркештің өкілі еді. Ал, қара түркеш түгелдей екі ұлыстан құралған гэшу (кошу) жұрты, қасэнің /касок/ бір тармағы. Айтпағымыз ол да емес, Сулу әлде Сиық өліп, гэшу ұлыстары ыдыраған кезде – оның құрамындағы қауымдардың көпшілігі сиық атымен белгілі болғаны. Мысалға он екі ата Байұлының сегіз руының басын құрайтын үш Сиық: Қыдырсиық, Сұлтансиық, Бақсиық. Олар беріге дейін, Байұлы боп біріккенге дейін, Сиық (Ших) боп жүрді. Сіргелінің Ақсиық, Қарасиық, Қожасиық аталары осы пайыммен сабақтас. Сиық, Сиқым атаулары тамырлас.
Жаныс. Түрікке қатысты тарихи әдебиеттерде жаныс (шуниш, суниш) есімі шамамен 610 жылдары хатталған. Зерттеушілер оны бірауыздан «Шүйе тайпасы» қатарына жатқызады. Ашина түріктерінің шығу тегі туралы «Чжоушу» жылнамасы олардың Бөріден тараған төрт ру ел екенін айта келіп, үшінші ұлды «енді бірі Чучжэ өзенінің бойында мемлекет құрған» деп нақтылайды (Қазақстан тарихы туралы қытай деректемелері. ІV том. Алматы, 2006.// «Чжоушу» жылнамасы, 50-цзюань, «Туцзюе баяны». 120-б.) Чучжэ өзені – Алтайдың биік шатқалынан құлап ағып, Би мен Қатунға бірдей құятын орысша Чуе, қытайша Чучжэ, байырғы түрікше Шүй өзені. Міне, осы өзен аңғарында жасаған елді «Шүйе тайпалары» деп атаған. Солардың қатарына чумукунь, чуюэ, чуми, шатолармен бірге шүніштер де жатады. Әу бастағы шүніштердің, кейін шүніш – чубан аталуы – тайпа құрамында өзгерістер болғанын меңзейді. 603 жылы Істемидің ұлы Тарду ұлы қаған тағын тастап Тугухунға қашып, оның көмекшілері Ніл қаған мен Тұң ябғу Батыс Түрікке қайтып оралып, біртұтас Түрік елі батыс, шығыс болып екіге бөлінгенде шүніштер қатары жаңа қауыммен толыққан сияқты. Қалай дегенмен де, Шығыс Түрікте билік басына жақын Сүніш есімді кіші қаған болды. Түріктің ұлыс билеушілерінің көбі қытай жылнамаларында билеген тайпасының атымен аталғанын ескерсек, Шығыс Түрікте де сүніш, шүніш қауымы болған. Шындығына келгенде, «шүйе тайпалары» әу бастан-ақ Шығыс Түріктің жұрты еді, олардың Ышбара (Шэту) қаған заманынан бастап, Гоби шөлінің оңтүстік жиегі Ақбелдеуді асып, Қытай шекарасына кетуі – «шүйе тайпаларын» Тарбағатайға жылыстап, ақыры Батыс Түрік қатарына қосылуға мәжбүр етті.
Біртұтас Түрік қағандығы екіге бөлінгеннен кейінгі кезеңде Батыс Түрікте Аба қағанның ұрпағы Шора мен Істеми қағанның ұрпағы Шэгуй бірігіп биледі. Шэгуйдің иелігі Ташкентте, Шораның иелігі Жетісуда еді. Шэгуйге сенбеген Шора оның сыртынан қарауыл қарау үшін өз қарамағындағы шүніш – жаныстарды 610 жылдар шамасында Ташкент төңірегіне көшіріп, қондырды.
Сөйтіп, жаныстар Ташкент ұлысына етене болып, сол өңірде отырып қалды. Олардың жаз жайлауы Үлкен Жұлдыз өзенінің аңғары еді. Жаныстар Ташкент пен Үлкен Жұлдыз аралығына Ферғана, Қоқан арқылы ілгері-кейін сабылып, осы өңірдің әуелі түріктенуіне, ақыры дулаттануына септігін тигізді. Осы кезде шато тайпасының көсемі Фугоның шешесі Шүніш тайпасының қызы болғаны туралы қытай жылнамасына дерек түскен. Сондай-ақ, «Сүй кітабы. Батыс өңір баянында»: Чюцының (Құшар) билеушісінің фамилиясы Бэй, есімі «Суничи» деген дерек те кездеседі (Таным тармақтары. Алматы, 1998. 183-б.).
Аталмыш қауымның Тан сарайының отаршыл әскеріне қарсы күрестері, Батыс Түрік қағандығының саяси-әлеуметтік өмірінде алған орны еңбекте мұқият баяндалғандықтан оларды қайталап жатпайдық.
Чумукунь /шөмекей/. Чумукунь – батыс жундардың, яки, Шығыс Түркістан өңірінің ежелгі тайпаларының бірі. Олар Қытай тарихының назарына б.д.б. 640 жылы іліккен «640 жылы лиаң, руй, мугундарды жояды» деген мәлімет бар (Таным тармақтары. Алматы, 1998. 33-б.). Мау Жиннің Қытайдың батыс шекарасын 1000 шақырымға кеңейткен жорығында жеңілген мугундар Алтай сыртындағы Шүй өзеніне кетіп, сол жерде чумукунь, яки, «Шүй өзенінің мугундары» аталады. Осында отырып, олар Ашина түріктерімен етене болады.
Чумукундар Батыс Түріктің соңғы қағаны Ашина Хэлу және Екінші Шығыс Түрік қағандығы кезінде белсенді әрекеттерімен көзге түсті. 642 жылы Ілбіс Шэкуй қаған Ашина Хэлуді ұстауға әскер шығарғанда, оның жазықсыздығын айтып чжишэди, чумукунь, боби (софу, сәбег) тайпалары ара түсті. Ілбіс Шэкуй оларды жазаламақ болғанда, Ашина Хэлумен ілесе кетіп, Бесбалықтан бір-ақ шықты. Осыдан кейінгі кезеңде чумукундар қаған тағы үшін тартыста, Қытай отаршыл әскерімен күресте ақыр аяғына дейін Ашина Хэлумен бірге болды.
Чумукунь 40 мың әскері бар іргелі ұлыстардың бірі еді. Бесбалық, Тұрпан, Құшарға мол әскер жиған Тан сарайы Батыс Түрікті күшпен басып алу жорығына кіріскенде, әп дегендегі нысаналары осы Чумукунь ұлысы болды. 654 жылы Қытай отаршыл әскері Чумукунь (Шәуешек) кентін басып алып, 30 мың адамын өлтірді. Ал 658 жылғы Қытай әскерімен шешуші ақтық шайқас та Чумукунь жерінде, Қара Ертістің батыс жағалауында болды. Ашина Хэлуді қорғап, қаша ұрыс салған чумукунь әскері Испинжабқа дейін жетіп, жергілікті қала басшысы қағанды тұтқындаған соң, чумукунь жасағы бет-бетіне ыдырады.
Қытайға бағынышты болған соң, Еміл өзеннің бойында оларға арналып Фуньян (Байан) тұтұқтығы құрылды. Чумукунь ұлысы Батыс Түрік тайпаларының Қытайға қарсы көтерілісінің бірде бел ортасында, екіншіде ұран отын жаққан бастаушысы болды. Олар 771 жылы өздерінің тұтұғы Ашина Дучжиді қаған жариялап, көтеріліс ұранын лаулатып, Жетісуды қытайлардан азат етуге аттанысты. Ашина Дучжидің қапыда қытайлардың қолына түсіп, өлтірілуі салдарынан бұл баскөтеріс өзінің жемісін бермеді.
711-712 жылдары Тонұқұқ, Тардуш шад ( Білге қаған) бастаған әскер Түркештің Сақал қағанын күйретіп, оларды өзіне бір ұлыс етіп қосып алды. Осы кезде чумукундар және Чумукунь жері Шығыс Түріктің әскер ұстайтын батыстағы бекінісіне айналды. Онда Қапаған ұлы Бөгү қаған 40 мың әскермен тұрды. Асылы, бұл әскер чумукунь қосыны болса керек.
Батыс Түріктің белді тайпасы чумукунь кейінгі шөмекейлер екені дау туғызбайды.
Гэшу (Кошу). 627-641 жылдар аралығын қамтитын «Тунь Дянь» еңбегінде: «Сичжоудан терістікке қарай Долосы (Талас-Ә.С.) өзенінде тұрып, бес тайпа елді: чуюэ, чуми, гусу, гэлолу, бишилерді биледі» деген дерек ұшырасады. Осындағы гусудың – гэшу екені талассыз.
640 жылдар деректемелеріне қарағанда гушу (гэшу) не бес дулу, не бес нушиби қатарына кірмеген Батыс Түрік тайпаларымен бірге жүргенін байқаймыз.
Ашина Бучжен, Ашина Мишэ, Ашина Хэлу – Жетісудың шығыс бөлігіндегі бес дулуға кірмейтін ұсақ руларды билеген ағайынды адамдар еді. Ашина Бучжен чуми (чомул), гусу (гэшу), гэлолу және нушибидің бір аталарын, Ашина Мишэ чуюэ (шүйе), Ашина Хэлу – хэлу (қара), гэло (қарлұқ), еда (эфтал, абдал), седе (едіз) қауымдарын биледі. 640 жылы Тан патшалығының әскері тұтқиылдан Бесбалық пен Тұрпанды басып алғанда Ашина Мишэ мен Ашина Бучжен отаршыл әскерлердің құзырына бас иді. Әлгілердің опасыздығынан жау жақ қапталы үңірейіп қалған Долу Үкік қаған Ашина Хэлуді шақырып алып, осы өңірдің билігін оның қолына берді. Ашина Хэлу отаршыл әскермен ақтық демі қалғанша тайталасып, үміт үдесінен шықты.
Гэшудің шағын бір тобын Ашина Хэлуге басқаруға берілген жұрт ретінде қарлұқтармен жапсарлас Тарбағатай өңірінен көреміз. Тайпалардың шағын топтарының әртүрлі қауымдар арасында шашылып жүруі – Түрік тарихы үшін дағдылы жағдай.
«Синь Тан шу» жылнамасы гэшу қауымының негізгі тобын, екі ұлыс елін Қаратаудың ұзына бойына орналастырады. Олардың үлкен ордасын «Гэшучосыцзин» (гэшу-чор-иркін) лауазымды, кіші ордасын «Гэшучубаньсыцзин» (гэшу-чобан-иркін) лауазымды көсемдер билеген. 711 жылғы Тонұқұқ, Тардуш шад (Білге қаған), Күлтегіндер Соғдақ жорығынан қайтып ораларда осы гэшу ұлысының көсемі Кошумен соғысады. Күлтегін оларды Жетісу асырып қуып салады.
Әңгіме Кушу билеген гэшулердің ұлы ордасы туралы болып отырған сияқты. Кіші орда қонысынан қозғамай, түріктерге бой ұсынған. Түркеш қағандығынан кейінгі кезеңде осы гэшу, гушу қауымы Тұрпан, Құшар аймақтарынан көзге түседі. Аталмыш тайпаның бір өкілі Гэшу Хань тибеттермен соғыста Қытайға қол ұшын берген. Сол үшін тибеттер оны ұстап алып, өлтіреді. Оның орнын ұлы Гэшу Яо басады. Қытай жылнамасында Гэшу Хань Түркештің гэшу тайпасының өкілі деп көрсеткен.
Білге қаған жазуы Күлтегіннің Кошу тұтұқпен соғысы туралы мәлімет қалдырған. Әлкей Марғұлан бұл белгілі тұлғаны Қосай батыр деп біледі. Қосай жұрты Атбасы өңіріндегі Қосай қамалында тұрып, өзен-көл, тауларға өз атын беріп, «Манас» жырына қаһарман боп еніп, кейін Ұлы жүз тайпа құрамдарына енгені байқалады. Ал бұл қауымның екінші ұлысы оңтүстік орыс даласынан шығып, Лукоморье қыпшақ ұлысын құрап, кейін Байұлы бірлестігінен табылған іздері анық аңғарылады. Олар адайдың Қосай аталарын құрады.
Чуюэ (Шүйе), Чуми (Чомыл). Ежелгі «Шүйе тайпаларының» қатарына жатады. 627-641 жылдар аралығын қамтитын қытай деректемелерінде: «Тұрпаннан терістікке қарай 750 шақырым жерде чуюэ, чуми, гусу, гэлогу, биши» тайпалары бары айтылған (А.Г.Малявкин. Историческая география Центр. Азии. Новосибирск, 1981. Түсінік-33. 91-б.). Сілтеме Тарбағатай өңіріне меңзейді.
638 жылы аталмыш екі тайпаны Батыс Түрік қағандығының тағына таласты Үкік шадтың шылауынан көреміз. Ол ата тек шежіресі жағынан Батыс Түрік қағандарының бірде-бірімен байланыспайды. Сол себепті оны Шығыс Түріктің Шора (Чуло) қағанының ұлы Үкік шад деп пайымдадық. 627 жылы терістіктегі сір-енда, хуэйха көтеріліс жасағанда оларды жөнге салуға Сели қаған Үкік шадты жұмсаған. Ол 100 мың қосынмен барып, ұйғыр Пусадан Атжал тауында оңбай жеңіліп, батыс өлкеге қашуға мәжбүр болады. «Синь Тан шу» «Хуэйхэ баянында: «Сели Юйгу-шэні 100 мың шерікпен жорыққа аттандырды. Пуса оларды Мале тауында талқандап, онан соң солтүстіктегі Тань-шань тауына дейін қуып барып, көп адамын тұтқынға алып, терістік далада аты жер жарды» деп жазады (ҚТТҚД. «Синь Тан шу», 217-цзюань, «Хуэгу (Хуэхэ) баяны». 331 б.). Үкік шад Селидің бетіне көріне алмай Бесбалық барып тұрып қалады. Ұзамай қайтып оралып, Селидің қарсыласы Тули ығында болып, Қытай бодандығын бірге қабылдайды. «Сели қағанның інісі алдымен Гаочанға қашып барып, кейін ол да келіп бағынды» деген «Синь Тан шу» дерегі осы Үкік шад тағдырына байланысты айтылса керек (ҚТТҚД. «Синь Тан шу» 215-цзюань, «Туцзюе баяны». 164-б.). Шора қағанның екінші ұлы Ашина Шэр Бесбалықты билеп тұрған. Үкік қытай резервациясынан қашып, немере ағасына келсе керек. Сол ағасының көмегімен чуюэ, чуми тайпаларын билеуге қол жеткізген сияқты.
Ол Батыс Түрікке беделін асыру үшін, Гаочан билеушісі Кюй Вэнь – таймен тізе қосып, Қытай жағын ұстанған Қарашарды талқандады. Мұның әсері болмай қалмады. Бес нушиби оны қаған көтеру қамына кірісті. Нәтижесінде ол Тона қағанмен Батыс Түрікті бөліп билеуге қол жеткізді. Үкік қағандықтың батыс бөлігін, яки нушибилерді биледі. Батыс бөліктің қонысы бұл кезде Шу, Сырдан Қоқан, Ферғана арқылы Тұрпан, Бесбалыққа дейін созылып жатты. Үкіктің бір ордасы Бэйтінде (Бесбалықта) болды. Осы кезде оған арғын-басмылдар, қырғыздардың бір бөлігі бағынышты болды. Үкіктің жорықтарына басмылдың била (элочжи) тайпасы қатысты.
Билікке табан тіреп, нығайған Үкік өзінің Ашиналарына арқа сүйеуге тырысты. Осы кезде ол Ашина Бучжэн, Ашина Мишэ, Ашина Хэлулерге тайпа, тайпа бірлестіктерінің тізгінін берді. Ашина Мишэ чуюэ, Ашина Бучжэн чуми, гусу, гэголу, биши, Ашина Хэлу хэлу, ида, еда, седе қауымдарын биледі. Кейін Ашина Бучжэн, Ашина Мишэ опасыздық істеп, отаршыл әскерге барып берілгенде, аталмыш тайпалардың барлығы Ашина Хэлуге бағынды.
Чуюэ, чуми тайпалары батыс қанат, шығыс қанат боп, екіге бөлінгені байқалады. Сір-енда ертеректе Алтайдың батысында «Шүйе тайпаларымен» көршілес болған ел еді. Ол өзінің бұралаң тарихи соқпағын Тарбағатай өңірінен бастады. Кейін олар Жетісумен жапсарлас Жоңғариядағы киби тайпасымен бірігіп өз алдына жеке қағандық құрды. Ақыры олар Батыс Түрікпен араздасып, 627 жылы Шығыс Түрік даласына қоныс аударды. Міне, осы сір-ендалар арасында чуюэ, чуми жұртының бір қанаты кеткен сияқтанады. Өйткені, 647 жылы қытай генералы Ли Цзидің Отүкенде салған қырғыннан қашқан сір-ендалардың соңына Бесбалық билеушісі Ашина Шэр түскен-ді. Ол Моңғол Алтайында әлгілерді қуып жетіп, сір-енда және оның қатарындағы чуми, чуюэ тайпаларын талқандады (А.Г.Малявкин. Историческая география Ц.А… Түсінік – 63. 104 б.). Осы шапқыншылықта тұтылған сір-ендалар иркін Ашадэ Шицзяннің қолына өткеріліп, олар үшін Гаолань, Цилянь округтары ұйымдастырылғаны туралы дерек бар. Сір-ендалармен бірге қашқан чуми, чуюэ тайпалары туралы дерек жоқ. Бәлкім, оларды Ашина Шэр өзіне қосып алған шығар. Олай болса, ұзамай Ашина Шэр иелігін тастап, Қытайға қашқанда, аталмыш жұрт басмылдарға барып қосылса керек.
Чуюэ мен чуми тайпаларының Үкік қағанның басшылығымен жүзеге асырған жорықтары Үкік қаған тарихында бастан-аяқ баяндалғандықтан, қайталап ежіктеу артық болады. Маңыздысы сол – аталмыш екі тайпаның кейінгі қазақ қауымының белгілі тайпаларына бастау болғаны. Чумиді қытай тарихшылары чумул, чомыл деп баламалайды. Чомыл басқа емес, албан, шапыраштыларға астар болған шыбыл жұрты. Ал чуюэнің дұрыс баламалануы шүйе болса керек. Ол – Шүйе өзенінің атын ұстап қалған қауым. Шүйе болса қазіргі найман садырдың бір бұтағы. Осы «шүйе тайпалары» қатарындағы шатоны – сато-садыр деп әліптеушілер де бар. Сондай-ақ, б.д.д. бұрынғы кезеңде Тань – Шань тауының шығыс беткейінде көкжар, қаратай қауымдарының отырғаны да тарихта таңбаланған. Ендеше, найманның бастауын чуюэ жұртынан іздеген жөн болады.