КӨЛІК КӨРМЕСІ КӨҢІЛДЕН ШЫҚТЫ
Кеше елордада 12 қазанға дейін созылатын жылдың негізгі авто уақиғасы – «Astana International Auto Salon – 2014» (AIAS-2014) екінші Халықаралық көлік көрмесі басталды.
Бүгінгі таңда Президент аппаратының оң бағасына ие болған көрме Инвестициялар және даму министрлігінің, Астана қаласы әкімдігінің және Қазақстандық автомобиль бизнесі қауымдастығының ресми қолдауымен өтуде. Ал, басты ұйымдастырушы – «ExpoGroup» халықаралық көрме компаниясы.
Көрмеде «MITSUBISHI», «RENAULT», «JEEP», «Volkswagen», «Maserati», «SsangYong», «Peugeot», «IVECO», «Hyundai», «Lada», «SKODA», «KIA», «CHEVROLET» секілді брендтер көрсетіліп, қонақтарға әлемдік және отандық автомобиль өндірісіндегі жетістіктер туралы мағлұматтар берілді. Сондай-ақ, автобұйымдар, қосалқы бөлшектер, автохимия және автокосметика, тюнинг, автоэлектроника, автонесиелендіру және автосақтандыру жайы да назардан тыс қалған жоқ.
Электр көлігін елімізде алғаш рет таныстырған халықаралық автосалон осы жылы өз қатарына гибридті автомобильдерді қосып отыр. «Жасыл технология» тақырыбымен қолға алынған бұл шара қоршаған ортаға неғұрлым аз зиян келтіретін инновациялық технологияларды енгізу жолындағы маңызды қадам болғалы тұр. Әсіресе, бұны 2017 жылы Астанада өтетін «EXPO» бүкіл әлемдік көрмесін өткізу қарсаңындағы маңызды іс деп білу керек.
Көрме бағдарламасы бойынша қатысушы компаниялардың және ұйымдастырушылардың түрлі тұсаукесерлері, акциялары, шоулары және байқаулары өткізілді.
Нұрислам ҚҰСПАНҒАЛИ