Кеше «Астана Опера» театрының камералық залында қазіргі заманғы отандық музыкаға арналған «Тұсаукесерлер кеші» өтті. Концерт Қазақстан Республикасы тәуелсіздігінің 25 жылдығына орай «Қазіргі заманғы композиторлар» циклы аясында ұйымдастырылды.
Көрермендер Кеңес Дүйсекеев, Балнұр Қыдырбек, Серік Еркімбеков, Төлеген Мұхамеджанов, Серік Әбдінұров сынды танымал композиторлардың және жас сазгерлердің музыкасына құлақ құрышын қандырды.
Кештің бірінші бөлімінде жеке және аспаптық ансамбльдің сүйемелдеуімен музыкалық шығармалар орындалса, екінші бөлімінде Қазақстанның еңбек сіңірген қайраткері Абзал Мұхитдинов жетекшілік ететін «Астана Опера» театрының Камералық оркестрі өнер көрсетті.
– Еліміздің тәуелсіздігіне биыл 25 жыл толып отыр. Осы жылдар ішінде талай музыкалық шығармалар жазылды. Егемен елдің шығармашылық кеңістігі де жас буын композиторларымен толықты. Бүгінгі заманның композиторлары шығармаларынсыз Қазақстанның музыка әлемін елестету мүмкін емес. Біздің мақсатымыз – танымал композиторлармен қатар жастарға да қолдау көрсету. Жалпы жас композиторлардың тырнақалды туындыларының «Астана Опера» театры сынды үлкен сахнада орындалуы олардың шығармашылығына үлкен мүмкіндік ашады. Аталмыш концерт жастарға шабыт беріп, шығармашылықтарының шыңдалуына сеп болды деп ойлаймын, – деген дирижер осындай концерттер отандық композиторлық мектептің, жалпы алғанда, қазақстандық музыканың қай бағытта дамып отырғанын көрсететінін жеткізді.
Аманғали ҚАЛЖАНОВ
