Жуырда Нұр-Сұлтан қаласында астанада тұратын белгілі суретшілер мен қолданбалы өнер шеберлерінің «Көктемгі серуен» атты көрмесі ашылды.
Наурыз мерекесіне орай ҚР ҚК Әскери-тарихи музейінде ұйымдастырылған көрмеге отыз бес суретшінің жүзге жуық туындылары қойылды. Олардың қатарында бейнелеу өнерінің белгілі өкілдері К.Муллашев, С.Маханбет, В.Пирожков, М.Тұқсаитов, А.Баяндин, Е.Айтуаров, М.Байтенов, Т.Батанов, Р.Ахметжанова және тағы басқалар бар.
Сондай-ақ көрмеден Г.Жұрқабаева, А.Әубәкірова, А.Минайдарова, А.Әли сияқты жас таланттардың шығармаларын да тамашалауға болады. Астаналық қылқалам шеберлері өз туындыларында ұлттық мәдениет пен бай салт-дәстүрдің табиғатын әртүрлі жанр мен мәнерде барынша ашып көрсете білген.
Сырттағы боран мен дауылға қарамастан көрмеге келген көпшіліктің көктемгі көңіл-күйге бөленіп, жақсы әсер алып қайтқандары анық.
