Конгресс-холл алаңындағы концерттер
Күн жылынғалы әр бейсенбі-сенбі сайын, үш күн қатарынан Астана қаласы Мемлекеттік академиялық филармониясының шығармашылық ұжымдары Конгресс-холл алаңында тегін концерттер беріп келеді. Қазақстан Республикасы Тәуелсіздігінің 25 жылдығына орайластырылған шараны кез келген адам сағат 18.00-ден бастап тамашалай алады.
Бүгін алаңда камералық хор мен ағаштан жасалған үрмелі аспаптар квинтеті өнер көрсетеді. Атауы айтып тұрғандай, бес адамнан жасақталған топ құрамына халықаралық байқаулардың лауреаттары Нұргүл Сапарова (гобой), Жібек Сапарғалиева -Жәкенова (флейта), Владимир Ардашев (фагот), Қуаныш Сағымбаев (валторна) және Ғани Исмайылов (кларнет) кіреді.
Квинтеттің репертуарында И.С. Бах, В.А. Моцарт, Л.В. Бетховен, Рейх, Э. Григ, М. Глинка, П.И. Чайковский, т.б. классик композиторлардың музыкасы және Е. Бозз, Таффанель, Е. Пуленк сынды заманауи композиторлардың шығармалары бар.
Сондай-ақ, топ мүшелері ұлттық музыканы да насихаттаудан танбайды. Концерттерінде қазақ композиторларының туындылары, қазақ әндері мен күйлерінің үрлемелі аспаптарға лайықталған нұсқаларын орындайды. Мәселен, Нұрғиса Тілендиевтің «Махамбет» пен халық әні «Алқоңырды» репертуарына енгізген.
Ал ертең алаңда филармонияның Дәстүрлі ән бөлімінің, дәстүрлі музыка ансамблі мен «Шалқыма» халықтық би ансамблі өнерпаздарының өнерін тамашалауға болады. Сенбі күні классикалық және эстрадалық вокал солистері, «Артист» эстрадалық би тобы өнер шашады.
Аманғали ҚАЛЖАНОВ