Көпбалалы отбасылар жайы назардан түспейді
Нұр-Сұлтан қаласында көпбалалы және жағдайы төмен отбасыларға қандай жағдай жасалып жатыр? Бұл туралы қала әкімдігінде өткен жиында белгілі болды.
Қазіргі уақытта көмекке аса мұқтаж отбасылардың деректер базасы құрылып, нақты қажеттіліктер мен проблемалар анықталды.
Әрбір отбасын қолдау жөніндегі жеке шаралар жоспары әзірленді. Сол сияқты тұрғын үй кезегінде халықтың әлеуметтік жағынан осал топтарына жататын азаматтар, соның ішінде көпбалалы аналар, аз қамтылған азаматтар мен мүмкіндігі шектеулі адамдар тұр. Қосымша қаражат есебінен шамамен 1800-1900 пәтер беру жоспарланып отыр.
Қалалық әкімдік тарапынан қиындыққа тап болған әрбір отбасы «Жұмыспен қамтудың жол картасы», «Бизнестің жол картасы» бағдарламалары мен атаулы әлеуметтік көмек аясында қолдауға ие болып отыр, сондай-ақ азаматтарды жұмысқа орналастыру мәселелері де шешілетін болады.