КӨРЕРМЕНІН ҰЙЫТАР «ҰЙҚЫДАҒЫ АРУ»
Астана күні қарсаңында «Астана-Опера» мемлекеттік Опера және балет театрының сахнасында П.Чайковскийдің «Ұйқыдағы ару» балетінің тұсаукесері өтеді.
Балет премьерасы заманымыздың көрнекті балетмейстері Юрий Григоровичтің жаңа хореографиялық өңдеуімен ұсынылады. Ресей хореографиясының хас шебері «Ұйқыдағы аруды» бұрынғы балетмейстерлерде жиі кездесетін тек балалар ертегісі немесе ойын-сауық феериясы ретінде қоймайды, Чайковскийдің музыкасына сәйкес өз кезегінде жанды рухтандыратын поэма сияқты ұсынады.
Премьераға дейін санаулы күндер қалды. Қазір театр сахнасы безендіріліп, атақты балетті қоюға қызу дайындық жұмыстарына кіріскен. ХVІІ ғасырда Франция королінің билігі кезіндегі көріністер көрерменді бейжай қалдырмайтындай асқан толғанысты сәттерге толы. Әсерлі көріністер мол. Мұны дәл осы кезде «Астана-Операға» бас сұққан әрбір адам тап басып таныр еді.
Театрда соңғы дайындықтар жүруде. Италиядан Астанаға әкелінген салмағы төрт тонналық «алтын жалатқан» декорациялар орнату аяқталды. Ал, тек корольдік қорғандардан тұратын салмағы бес жүз келі қақпалардың өзі неге тұрады?!
«Көптен күткен қойылым бірнеше күннен кейін басталады. Әркімнің кеудесінде толғаныс бар екендігі көрінеді. Өйткені, театр жаңа, мұндағы мәдени өмір де жаңадан басталып жатыр. Сондықтан, асқан жауапкершілік пен тәжірибенің сынға түсетін кезі» деп пікірін білдірді қойылым суретшісі Эцио Фриджерио.
Спектакль үшін декорацияның 25-30 пайызы Қазақстанда жасалды. Қалғаны Италияда әзірленді. Тағы бір айта кетерлігі, оған әрлеу мен ажарлаушы және бояу жөніндегі әртүрлі цехтардан көптеген адамдар қатысты. Пластик, арматура, сұйық әйнек сияқты бірнеше материалдар пайдаланылды.
Суретші-сценограф Эцио Фреджирионың 350 спектакль қоюға бірге атсалысқан өз командасы бар. Қазақстанда оған мұндағы мамандармен қоян-қолтық жұмыс істеуге тура келді. Істің күрделі басталғанына қарамастан, нәтижесі жақсы шықты. Бұл спектакль бесінші рет қойылғалы отыр. Сондықтан, оның Миландағы «Ла Скаламен», Франциядағы «Париж Операсымен», Ресейдегі Үлкен театрмен жұмыс тәжірибелері бір биікке көтерері сөзсіз.
Асхат РАЙҚҰЛ