Көрнекті суреттер көрмесі
Тәуелсіздік сарайында белгілі фотосуретшілер Шүкір Шахайдың «Елі сүйген, елін сүйген Елбасы» және Владимир Куриловтың «Астана – Елбасының ерлігі» атты көрмелерін ұйымдастыруға арналған баспасөз конференциясы өтті. Қос көрме Қазақстан Республикасы Тұңғыш Президентінің күніне орайластырылып отыр.
Баспасөз конференциясында сөз алған Астана қаласы мәдениет басқармасы бастығының орынбасары Самат Тергембаев фотосуретшілердің әр суретінде Елбасының Астанаға деген махаббаты, жүрегінің жылуы және көзқарасы бейнеленгендігін атап өтті. Ал, белгілі сықақшы, «Шалқар» радиосының бас редакторы Көпен Әмірбек өзінің шәкірті Шүкір Шахай шығармашылығы жайында кеңінен әңгімелеп берді.
Елбасының өмірінен сыр шертетін Владимир Куриловтың көрмесі кеше Тәуелсіздік сарайында басталып, 5 желтоқсанға дейін жалғасады. Ал, Ш.Шахайдың көрмесі 27 қараша мен 6 желтоқсан аралығын қамтиды. Бір айта кетерлігі, В.Куриловтың жұмыстары Астанада алғаш рет жұртшылық назарына ұсынылып отыр. Қос көрмеге Астана қаласының даму тарихынан сыр шертетін суреттер жиынтығы қойылады.
Хамит Ерболатұлы