Көшбасшы Тәуелсіз Қазақстандағы Президенттік институт
Конституциялық кеңестің төрағасы И.Роговтың пікірінше, «Қазақстандағы президенттік институт мемлекеттің ең маңызды қызметін институттандырудың ерекше формасы болып табылады. Ол биліктің басқа тармақтарының үстінен қарайтын саяси-құқықтық қабат сияқты. Президенттік биліктің басқа билік тармақтарынан жоғары тұруы тиімді қарым-қатынасты қамтамасыз етеді, осы арқылы Мемлекет басшысы Конституцияның, адам мен азамат құқықтары мен бостандықтарының жоғарғы арбитры мен нышаны бола алады. Мұндай құрылым Қазақстан тарихының, қоғамдық-мемлекеттік қатынастардың, дәстүрлі қоғамдық сананың негізінде қалыптасқан». Қазақстандағы Президенттік институтты жеке тұлғамен байланыстырудың (персонофикация) себебі де осыдан және ол Нұрсұлтан Назарбаевтың тұлғасымен тікелей байланысты.
Отандық тарих беттерінде тарихта із қалдырған талай адамдар есімі сақталған, бірақ Н.Назарбаев тұлғасының орны бөлек. Оның қызметіне, атқарған еңбегіне баға беретін – біз, оның замандастары.
Мемлекет басшысының дәрежесіне тек белгілі бір қоғамның өмірі мен дамуында өте жауапты рөл атқара алатын тұлға ғана шығарылатыны белгілі. Елдегі көп нәрсе Мемлекет басшысына байланысты. Алайда, бәрі емес. Олардың көбі тұлғаны ел басшылығына дейін көтерген қоғамның өзіне, қоғамдық күштерге тәуелді. Халық – біртекті және бірдей құрылған күш емес. Сайлау кезінде басшылыққа халықтың қандай топтары ие болды, адамдар азаматтық борышын қаншалықты дәрежеде орындады? Міне, осындай жағдайларға байланысты елдің тағдыры да шешіледі. Бір сөзбен айтқанда, халық қандай болса, таңдаған тұлғасы да сондай болмақ.
Н. Назарбаевтың жоғары дарындылығын мойындай отырып, оның бойынан харизмалық көшбасшы қасиеттерін байқау, әрине, қиын емес.
Саяси жетекші ішкі және халықаралық жағдайды, қоғамдық тәжірибені, ғылым мен мәдениет жетістіктерін терең талдауға қабілетті, әлеуметтік болмыстың күрделі жағдайында ойдың қарапайымдылығы мен саралығын сақтап, белгіленген жоспарды, бағдарламаны орындауға шебер болуы керек.
Даму бағыты мен болашаққа жетудің жолын айқындап берген алғашқы стратегиялық құжаттардың қатарында жобасын Нұрсұлтан Назарбаев жасаған «Қазақстанның егеменді мемлекет ретінде қалыптасуы мен даму стратегиясы» (1992 жыл) және «Қоғамның идеялық нығаюы – Қазақстан дамуының шарты» (1993 жыл) атты құжаттары болды. Бұл құжаттар Қазақстанның ашық қоғам типті – демократиялық, бейбітшілік сүйер мемлекет ретінде дамуының концептуалды үлгісін алға тартты. Стратегияда «Қазақстан: а) күшті президенттік республика болып табылады, ол адамның құқықтары мен бостандықтарына, тұрақты азаматтық бейбітшілік пен ұлтаралық татулықты қамтамасыз ететін саяси және идеологиялық плюрализмге, сенімді қорғаныс пен қауіпсіздікке, құқықтық теңдікке кепілдік береді; ә) әралуан меншік түрлері мен әлеуметтік жауапкершілікті кәсіпкерлікке, шетел инвесторларының қатысуымен таза бәсекелестікке негізделген дамыған нарықтық экономикаға сүйенеді; б) нақты айқындалған әлеуметтік бағыты бар, барлықтарына өз қабілеттері мен материалдық салауатын жүзеге асыру үшін тең мүмкіндіктер мен жағдайлар қамтамасыз етілген, әр халықтың ұлттық бірегейлігін сақтап, дамытады, тұрақты дамудың негізі ретінде ұлттық келісім (консенсус) саясатын жүзеге асырады» деп көрсетілген. Стратегия Қазақстан халқының өзін-өзі билеу процесінің негізін қалаған республиканың алғашқы ресми құжаттарының бірі болды.
Президенттік билігі бар егеменді мемлекетті дамыту елдің стратегиялық мақсатының өзегі болды. Жас республика үшін мемлекеттіліктің нақты контурларын белгілеп алу қажет болды. Дағдарыстың одан әрі тереңдей түсу мүмкіндігін ескере отырып, президенттік билік бірінші кезекте кезек күттірмейтін проблемаларды шешуге және қысқа мерзім ішінде аса маңызды реформаларды жүргізуге баса назар аударды.
Өткен уақыттың қоғамдық-саяси жағдайларын талдау нәтижесінде елді дағдарыстан шығарып, оған тұрақты даму параметрлерін қамтамасыз ете алатын күшті билікке деген қажеттіліктің болғанын байқауға болады (1991-1993 жж.). Бұл қоғам мен мемлекеттің өмір сүру аяларының барлық жақтарын қамтыған терең дағдарыс кезеңі болды. Дәстүрлі экономикалық байланыстардың үзілуі, жоспарлы экономиканың тоқырауы, кеңестік экономикалық құрылымындағы сәйкессіздіктер халықтың өмір сүру деңгейінің күрт төмендеуіне, әлеуметтік шиеленістің өсуіне алып келді. Жаңа саяси-экономикалық қатынастарға өту кезеңінде сол кездің саяси жүйесі әлсіздік танытты. Сол себепті де ол мемлекеттік басқарудың өтпелі формасы ретінде тоталитарлық қоғамнан либералды-демократиялық қоғамға өту кезіндегі қоғам өзгерісінің ерекшеліктерін ғана сипаттай алды.
1995 жылы 11 наурызда Президент демократиялық принциптердегі ұстанымын бекіту үшін Конституциялық соттың шешімін қолдай отырып, «Конституциялық сот қаулысынан туындайтын шаралар туралы» жарлыққа қол қойды. 1995 жылы Конституцияның қабылдану барысында президенттік басқару формасын заңнамалық рәсімдеуді атап өтуге болады, ал 1993 жылы Жоғарғы Кеңес өзін-өзі таратқаннан кейін және Президентке заңнамалық құқықты табыстағаннан кейін ол саяси нақтылыққа айналды. Осы кезде Президент Парламенттен, ал соттық корпус және соттық билік жеке тағайындау жүйесінен соң, өзінің еркіндігін білдіруге мүмкіндік алды. 1993 жылғы Конституция бойынша жоғары атқару билігін бақылау құқығы бар Конституциялық сот 1995 жылғы негізгі заңға сәйкес консультативтік-кеңес беру құқығына ие Конституциялық кеңес болып қайта құрылды. 1998 жылы негізгі заңға түзетулер енгізу арқылы президенттің айрықша құзыреттілігін кеңейту 7 жылға ұзартылды. Мұны президенттік биліктің нәтижесін көрсетудің ұлттық моделі және Президенттің тоқсаныншы жылдардағы дағдарыстан елді алып шығуынан деп қорытындылауға болады.
Демократиялық идеалды ұстану конституциялық реформалар барысында біліне бастады, нақтырақ айтқанда, 2007 жылдың 21 мамырында мемлекет өмірі үшін маңызды «Қазақстан Республикасының Конституциясына өзгерістер мен қосымшалар енгізу туралы» Қазақстан Республикасының Заңы қабылданды. Мұнда мемлекет құрылысының қазақстандық моделінің параметрі сақталды. Модель шеңберінде конституциялық реформаның енгізілуі мен айтулы қатынас жүйесінің модернизациясы қарастырылды. Азаматтық қоғам институттарының жан-жақты даму бағытының арқасында мемлекет пен қоғамды үндестіру, мемлекеттік және қоғамдық институттардың белсенді әрекеттестігінде конституциялық шектеулерді алып тастау, жергілікті өзін-өзі басқаруды жаңғырту, бүгінде еліміздің қажеттіліктеріне және ішкі жағдайларға толықтай жауап беру жүзеге асырылды. Конституциялық деңгей сот-құқықтық реформалардың жаңа кезеңіне күш беріп, сот төрелігіне жөнелтіліп, сот тәуелсіздігін бекітуге бағытталды.
Жүргізілген реформалар мемлекеттік және қоғамдық институттарды демократияландыруға күш салды. Конституциялық түзетулер негізінен республика дамуының болашағы үшін ұзақ жылдар талқылауға тартылған мемлекеттік билік тармағының барлық өкілдері, осы комиссия аясында көп жұмыс істеген саяси партия және қоғамдық қайраткерлердің еңбегінің нәтижесі еді.
2011 жылдан бастап Президенттің өкілеттілік мерзімі 7 жылдан 5 жылға қысқартылды. Президенттің құзырет ету кезеңінде саяси партия құрамында қызмет ету құқығын шектейтін норма жойылды. Парламент депутаттарының бірауызды шешімімен Қазақстан Республикасының Президенті және жалпыұлттық көшбасшы Н. Назарбаевқа заңнамалық екі рет сайлауға түсу мерзімінен тыс, жанама негізде сайлауға түсуге қосымша құқық пен мүмкіндік берілді. Президент өкілеттілігінің Парламентпен, Үкіметпен, Жоғарғы Сотпен, Орталық сайлау комиссиясымен, Ұлттық банкпен және әкімдер – жергілікті атқару органдарымен қатынасы айқындалды.
Президент заңнамалық бастамаларды үлестіру және жекелей Мәжілісті тарату құқығына ие болды, бірақ бүкіл Парламентті емес.
Үкіметтің енгізілген жауапкершілігі Президенттің алдында ғана емес, барлық Парламенттің, ақиқатында президенттік басқарудан президенттік-парламенттік басқаруға өтуде айтылған. Бұл – мемлекеттің құқықтық, демократиялық құрылысын күшейту. Қолданыстағы Конституцияның 40-бабына сәйкес, ҚР Президенті Мемлекет басшысы ретінде ішкі және сыртқы саясаттың негізгі бағыттарында оның жоғарғы тұлғалық қызметін көрсетеді. Президент – мемлекеттік билік пен халық бірлігінің, Конституцияның тұрақтылығының, адам құқықтары мен бостандықтарының кепілі. Ол барлық мемлекеттік билік тармақтарының келісіп жұмыс істеуін және олардың
халық алдындағы жауапкершілігін қамтамасыз етеді. Сондықтан, тікелей Елбасының өзі мемлекеттік аппараттың мақсатты жұмыс жасауын және адамдардың құқықтарын қамтамасыз ету, мемлекеттілікті нығайту және сақтау үшін конституциялық жауапкершілікті міндеттейді. Сондықтан, әрбіріміз мемлекет өміріне қатыстылығымызды және жауапкершілігімізді сезінуіміз керек.
Шынар Тауқыбаева,
тарих ғылымдарының кандидаты
Жабай Қалиев,
педагогика ғылымдарының
кандидаты