Астана қаласы әкімінің орынбасары Қосман Айтмұхаметовтың төрағалығымен Астанадағы экологиялық ахуал мәселесі жөнінде кеңес отырысы өтті. Оған қалалық департаменттер мен басқармалар, бірқатар коммуналдық және табиғат пайдаланушы кәсіпорын басшылары қатысты.
Жиын барысында жаңартылатын энергия көздерін дамытудың, баламалы қуат көзімен жүретін көліктердің, сондай-ақ, жылу электр станциясын экологиялық таза отын – газға көшірудің өзектілігіне айрықша көңіл бөлінді. Сонымен бірге, елордадағы велосипед қозғалысын одан әрі дамыту мәселелері талқыланды.
Астана қаласы бойынша экология департаментінің басшысы Абзал Егембердиев өз баяндамасында экологиялық проблемалардың шешу жолдарына тоқталды. Оның айтуынша, атмосфералық ауаны көбіне қоқыс қалдықтары ластайды. Сондықтан қаламыздағы қайта өңдеу жұмыстарын күшейту керек. Көгалдандыру алаңдарын ұлғайтудың өзектілігі де назардан тыс қалмады.
Осы ретте Қосман Айтмұхаметов экологиялық таза, жасыл технологияларды ендірудің қажеттілігіне аса мән берді. Кеңес қорытындысы бойынша, көтерілген мәселелерге сәйкес тиісті органдарға бірқатар міндет, тапсырмалар жүктелді.
