Лариса КРАСНИКОВА: ШЕТЕЛДІК КӨЛІКТЕР ТЕКСЕРІЛЕДІ
Лариса Красникова, Астана қаласы ІІД Әкімшілік полиция басқармасының ерекше тапсырмалар жөніндегі аға инспекторы
– Астана қаласында «Транзит» жедел-профилактика шарасы басталыпты. Бұл жұмыстың мақсаты не?
– Соңғы уақытта елімізде шетелдік көлік жүргізушілері тарапынан болатын Жол қауіпсіздігі ережесін бұзу жағдайлары жиі орын алып кеткен болатын. Соған орай, Жол-патрульдік полициясы тиісті шара қолдануға тура келді. Сіз айтып отырған «Транзит» жедел-профилактика шарасы, міне, осы мақсатпен жүзеге асырылып отыр.
– Шетелдік көлік жүргізушілері тарапынан соңғы айларда қанша ереже бұзушылық болды және олардың сипаты қандай?
– Тек қана соңғы тоғыз айдағы мәліметтерді келтірер болсам, республика бойынша шетелдік көліктердің жүргізушілері тарапынан 26 мың жол ережесін бұзу оқиғасы тіркелген. Олардың 28-і – жол-көлік оқиғасы. Соның салдарынан 58 адам әр түрлі жарақаттар алған.
– Енді «Транзит» жедел-профилактикалық шарасы бойынша тек шетелдік көліктер қатаң тексерілетін бола ма?
– Әдеттегідей, қалада жол ережелерінің сақталуы қатаң бақылауда болады. Алайда, арнайы «Транзит» шарасына 500 қызметкер жұмылдырылған. Осы жол-патрульдік полициясы мен көші-қон полициясы қызметкерлері шет елдерден келген көліктерді ерекше бақылауға алатын болады. Олардың бұрын-соңды ереже бұзып не бұзбағаны, құжаттарының дұрыстығы – түгел тексеріледі. Жүк тасымалдау көліктері, жеңіл автокөліктер, тағы басқа көлік құралдарын кіргізу кезінде көлік иелерінің кедендік бақылау заңнамаларын сақтамай немесе басқа да заңбұзушылыққа барғаны анықталса, олар дереу елімізден шығарылады.
– Бұл қанша күнге созылады?
– «Транзит» жедел-профилактика шарасы 27 қазанға дейін жүргізіледі.
Нәзира САЙЛАУҚЫЗЫ