Oquşylardy käsıpkerlıkke baulu, ıskerlıkke yntalandyru, biznes-ideialardy jüzege asyruǧa jol aşu – mektep qabyrǧasynan-aq bastau alatyn mümkındıkter. Jastaiynan ısker köşbasşy atanuǧa ūmtylǧan jastardyŋ tyŋ jobalaryn qoldau maqsatynda jaqynda Astanada Enactus Kazakhstan National EXPO 2023 mektep käsıpkerlıgınıŋ IV respublikalyq chempionaty aiaqtalyp, tartysty saiysta top jarǧan üzdıkter anyqtaldy. 70 mektep komandasy qatysqan dodada ozyq oily jasöspırımder bas qosqan Astana halyqaralyq mektebı chempion atandy.
Respublikalyq mektep käsıpkerlıgı chempionaty – Enactus halyqaralyq qauymdastyǧynyŋ bastamasymen ötkızıletın jyl saiynǧy baiqau. Käsıp bastaimyn degen jastardy bırıktıretın bıregei alaŋǧa biyl elımızdıŋ 17 öŋırınen komandalar qatysty. Chempionatqa qatysuşylar oqu jyly boiy äleumettık, ekologiialyq jäne innovasiialyq jobalardy oilastyryp, şyŋdaumen jūmys ıstedı. Olar ekı kün aralyǧynda türlı taqyryptaǧy startap jobalardy tanystyrdy. Är jobanyŋ basty maqsaty – elımızdegı özektı mäselelerdı şeşuge atsalysu.
Jeŋımpaz Astana halyqaralyq mektebınıŋ oquşylary tyŋ ideiany ūsynumen erekşelendı. Mekteptıŋ «Revera Team» toby byltyr da käsıpkerlık chempionatynda jeŋıs tūǧyrynan körınıp, jüldelı 2-oryndy alǧan edı. Al būl jolǧy chempiondar – ISA Engineers toby saiysta alǧaş ret baq synady. Ötken jyldyŋ qyrküiegınde qūrylǧan top dodaǧa segız ai kölemınde qyzu daiyndaldy. 10 jäne 11-synyp oquşylarynan qūralǧan topta jetı adam bar. Ärqaisysynyŋ öz mındetı de aiqyndalǧan. Baǧdarlamalau, dizain jäne marketing salasyna mamandanǧan oquşylar osy bastan-aq IT-salasyna ülken qyzyǧuşylyq tanytuda.
ISA Engineers toby chempionatta ekı jobany ūsyndy. Būl turaly top basşysy Mäulet Seiıtov keŋırek aityp berdı.
– Alǧaşqy jobamyz – «MinAvto». Būl – kölık jürgızu kezınde jürgızuşınıŋ ūiyqtap ketuıne jol bermeitın bılezık pen kamera. Iаǧni atalmyş qūrylǧy jürgızuşıge köz ıle bastaǧanynda belgı beredı. Nätijesınde onyŋ densaulyq jaǧdaiyn ünemı baqylauda ūstap otyrady.
Ekınşı joba – «Jurmek». Ol jürek soǧysyn eseptep, derekterdı mobildı qosymşaǧa lezde jıberetın portativtı EKG. Qūrylǧy jasandy intellekt arqyly elektrokardiogramma nätijesın derekqorǧa salady. Derekter negızınde qauıptı jaǧdai anyqtalsa, bırden jedel järdem qyzmetıne qoŋyrau şalady. EKG jobasyn jasauda bız otandyq jäne şeteldık ǧalymdardyŋ täjıribesıne süiene otyryp, ülken Data Set-tı (derekter jinaǧy) qoldandyq.
Jobalarymyzdyŋ negızgı maqsaty – adam ömırın saqtap qalu. Iаǧni bız jaŋa tehnologiialar arqyly jol apatynyŋ aldyn aluǧa jäne ölım-jıtım statistikasyn azaituǧa septeskımız keledı, – dedı top basşysy.
Izdenımpaz, ambisiiaǧa toly jas käsıpkerlerdıŋ endıgı maqsaty – jobalaryn köpşılıkke tanystyryp, naryqqa şyǧaru.
«Bız ekı jobany tolyqqandy daiyn önım retınde jasap, özgelerge ūsynǧymyz keledı. Eşbır kemşılıksız, qauıp-qatersız jūmys ısteuge daiyn bolǧanda, naryqqa şyǧaramyz» dedı oquşy.
Oquşylardyŋ aituynşa, mektepte käsıpkerlık negızderın damytuǧa arnalǧan arnaiy pän bolmaǧanmen, «Ekonomika» pänı oqytylady. Sözderınşe, biznes-ideialaryn jüzege asyruda salalyq pännıŋ bererı köp boldy.
Mektep käsıpkerlıgı – käsıptık baǧdardyŋ negızı ärı zaman talaby. Bügınde oquşylardyŋ basym bölıgı käsıp bastap, biznes aşsam deidı. Al būl jolda käsıpkerlık daǧdylaryn meŋgergen jastar ülken ömırge qadam basqanda, aldaǧy syn-kedergıge saqadai sai tūrady. Ozyq köşbasşy, myqty marketologtar mektepten-aq tärbielenıp şyǧady. Eŋ bastysy, ūsynǧan biznes-jobalary qoǧam igılıgıne jūmsalady.
