Transplantasiia öte kürdelı operasiia bolǧandyqtan, ony kez kelgen memleket jasai bermeidı. Belgılı bır eldıŋ medisinasy qandai deŋgeide ekenı aǧza auystyra alatynymen baǧalanatyny da sondyqtan. Qazaqstanda bügınge deiın osyndai 900 ota jasalsa, Astanada qalalyq deŋgeidegı alǧaşqy operasiia 2013 jyldyŋ 15 aqpanynda №1 qalalyq auruhanada jasaldy.
Osy uaqyttan berı elordada 33 transplantasiia jasalypty. Sonyŋ 20-sy – bauyr auystyru otasy eken. №1 qalalyq auruhana mamandary taǧy bır transplantasiiany sättı jasap, otanyŋ qalai ötkenı jönınde jurnalisterge aityp berdı.
Erlan Baimaǧambetov atty astanalyq tūrǧyn gepatit virusy saldarynan bauyr sirrozyna duşar bolǧan. Aurudyŋ asqynuy sebeptı onyŋ öŋeşınen tört ret qan ketıp, soŋǧy ret jaǧdaiy kürt naşarlap ketedı. Erlannyŋ ömırın qūtqaryp qaludyŋ jalǧyz joly – bauyryn auystyru edı. Aǧasynyŋ qasynda şyryldap jürgen qaryndasy bauyryna öz aǧzasyn bölıp beredı. Osylaişa, künı keşe ömır men ölım arasynda arpalysyp jatqan qala tūrǧyny operasiiadan dın aman şyǧyp, jurnalistermen äŋgımelesıp tūrdy. Auruhananyŋ transplantologiia jäne gepatobiliarly hirurgiia bölımşesınıŋ meŋgeruşısı Abylai Donbaidyŋ aituynşa, aǧzany auystyrǧannan keiın adamnyŋ ömırı bıraz jylǧa ūzarady. «Transplantasiiany erte qolǧa alǧan europalyq elderde aǧzasyn auystyrǧan adamnyŋ jasy orta eseppen 15-20 jylǧa deiın ūzarady. Astanada būl sala älı jas. Endı bır on jylda nätijesın naqty köretın bolamyz. Bıraq bız aǧzasyn auystyryp bergen adamdardyŋ bärı dın aman, jūmys ısteitınderı qyzmetıne qaita oralǧan» deidı ol.
Al №1 qalalyq auruhana bas därıgerınıŋ orynbasary Ǧaliia Äbejanovanyŋ aituynşa, elımızde jyl saiyn 200 aǧza auystyru operasiiasy jasalady. Olardyŋ barlyǧyna derlık tuystary donor bolǧan eken.
Bügınde Qazaqstanda transplantasiiaǧa mūqtaj 4 myŋ adam kezekte tūr. Olardyŋ bärıne bırdei donor tabyla bermeidı. Sebebı, halyqtyŋ būl turaly tüsınıgı älı dūrys qalyptaspaǧan. Şyntuaitynda, aiaq astynan ölım qūşqan bır adam 5-6 adamnyŋ ömırın qūtqara alady eken. Eger donorǧa eşqandai ziian kelmese, organynyŋ jartysyn beruge islam dını de qarsy emes.
Qymbat TOQTAMŪRAT
