AIMAQTARDAN AǦYLDY ÄN MENEN JYR…
Jyldaǧy dästür boiynşa Astanadaǧy biylǧy Nauryz toiyna elımızdıŋ öŋırlerı belsendı atsalysty. Atap aitqanda, Pavlodar, Soltüstık Qazaqstan, Aqmola, Atyrau, Jambyl jäne Almaty oblystarynan kelgen 360-tan asa öner maitalmandary än men jyrdan şaşu şaşty.
Äz Nauryz toiynda «Qazaq elı» alaŋynda qyryqqa juyq kiız üi tıgıldı. Aimaqtardan kelgen delegattar özderı tıkken kiız üidıŋ ışın sänge bölep, ūlttyq būiymdardyŋ körmesın ūiymdastyrdy. Kelgen qonaqtarǧa dombyramen än şyrqap, qazaqy qonaqjailylyqpen aq dastarqan jaidy.
Almaty oblysynan kelgen bürkıtşı Aibek Ötegen bırneşe jyldan berı saiatşylyqpen ainalysady eken.
– Mynau – «Baiqoŋyr» esımdı bürkıt, Qazaqstannyŋ bırneşe dürkın chempiony. Jetısu jerıne keŋınen tanymal. Astana törınde bolyp jatqan aituly toiǧa qatysyp, öz önerımızdı ortaǧa saldyq. Öŋırden kelgen tanymal öner adamdary alaŋdaǧy şaralarda mereke körıgın qyzdyruda. Bızdıŋ kiız üidıŋ ışınde qazaqtyŋ jetı qazynasy bar. Er azamatqa tän barlyq qajettı būiymdar käsıbi şeberlerdıŋ qolynan şyqqan, – deidı Aibek Ötegen.
UYZ LEBIZ
Quanyş SŪLTANOV, Parlament Mäjılısınıŋ deputaty:
– Nauryz – ruhani meiram. Kezınde türlı jaŋsaq közqaraspen dūrys tüsınbedık. Ejelden kele jatqan, altyn bastauyn ötken ǧasyrlardan alatyn airyqşa meiram bertınde qaitadan tamyr jaiyp, jaŋa ömırımızben üilestı. Kün men tünnıŋ teŋeletın merzımı – uaqyt jaǧynan alǧanda jyldyŋ basy. Jyl boiy adam qarbalasta jüredı. Kezdese almai, kelıse almai jürgender nauryz aiynda bır-bırıne aq jüregın aşady, yqylasyn aitady. Jaŋaru meiramy eldı bırlıkke, yntymaqqa şaqyrady.
Bas alaŋdaǧy aituly şaraǧa Atyrau öŋırınen jiyrmaǧa juyq adam kelgen. Delegasiianyŋ qūramynda Atyrau oblystyq tarihi-ölketanu mūrajaiynyŋ qyzmetkerlerı bar. Kelgen qonaqtardyŋ basym bölıgı Atyraudyŋ aq dastarhanynan däm tatyp, emın-erkın köje ışude. Qūrmanǧazy audandyq folklorlyq ansamblınıŋ önerpazdary Nauryz toiyna qyzyqty baǧdarlama ūsyndy.
– Elbasy kiız üiımızge az-kem aialdady. Atyraulyqtarǧa ystyq sälemın joldap, aqjarma tılegın bıldırdı, – deidı atalmyş muzei direktory, mädeniet salasynyŋ üzdıgı Serık Mūhambetov. Onyŋ aituynşa, äkelıngen būiymdardyŋ ışınen Jäŋgır hannyŋ äielı Fatima kigen qamzoldyŋ köşırmesı jūrttyŋ erekşe nazaryna ılıkken. Būdan bölek, süiekten jasalǧan būiymdar, kiız üi jasaulary men ūlttyq qolöner tuyndylary körmenıŋ sänın keltırıp tūr.
UYZ LEBIZ
Jūmaǧat ALPYSBAIŪLY, zeinetker:
– Şyǧys halyqtaryna ortaq meiram Nauryz – bırlıktıŋ merekesı.
Qystyŋ köbesı sögılıp, tırşılık ataulyǧa jan bıtıp, tabiǧat-ana jaŋaratyn uaqyt. Būl künı ärbırımız ötken jylǧy ökpemızdı ūmytyp, tatulyqty därıptegenımız jön. Jastar ülkenderdıŋ aq batasyn alyp, halyq qystyŋ qyspaǧynan qūtylyp, arqa-basymyz keŋeietın osynau meiramda elımızde tek tynyştyq saltanat qūrsyn dep tıleiık. Elbasymyz aman bolsyn!
Sonymen qatar, Soltüstık Qazaqstan, Şyǧys Qazaqstan, Qyzylorda, Aqmola jäne Pavlodar oblystarynan kelgen şeberler de özderınıŋ bıregei tuyndylaryn ūsyndy. Mūnda aǧaştan, keramikadan jasalǧan zergerlık būiymdardy, muzykalyq aspaptardy, kartinalar men kiımderdı, syrmaq pen tekemettı, basqa da qolöner tuyndylaryn köruge bolady.
Is-şaraǧa jetı oblystyŋ öŋdeuşı käsıporyndary da qatysty. Arnaiy tıgılgen aq şatyrlarda käsıporyndar özderı şyǧaratyn önımderden däm ūsyndy. Merekege barlyǧy 100 öŋdeuşı käsıporyn qatyssa, 150 tonnadan astam önım öndıruşınıŋ baǧasymen satyldy. Qoǧamdyq tamaqtanu oryndarynda merekelık sauda ūiymdastyrylyp, «Qazaq elı» monumentı alaŋy qyzyqty mädeni şaralardyŋ oşaǧyna ainaldy.
Gülmira AIMAǦANBET