Jaqynda jaŋaözendık mūnaişylar elordaǧa kelıp, ministrlık aldyna tünep, öz talabyn qoiyp qaitqany jūrtqa mälım. Qazır qūzyrly organdar men narazylyq bıldıruşıler arasynda dialog jürıp jatyr. Ärine, el bolǧan soŋ halyqtyŋ bilıkke öz talabyn qoiyp, jūmys talap etkenı qate emes şyǧar. Bıraq bügıngı aitpaǧymyz ol emes. Äŋgıme qazır osy narazylyqtyŋ soŋy taǧy da şetelden köşıp kelgen otandastarymyzdy kınälauǧa qarai auysyp bara jatqany jaiynda.
Jalpy Qazaqstanda şetelden kelgen aǧaiyndy qaralau, orynsyz jerden kınä taǧu ūdaiy beleŋ alyp keledı. Mäselen, 2011 jylǧy Jaŋaözen oqiǧasynan keiın äldekımder Prezidentke «köterılıs jasaǧandardyŋ köbı oralmandar eken» degen ötırık aqparat berıp, köştı toqtatuǧa ūrynǧan edı, sol bır auyz sözdıŋ kesırınen şetelden kelgen qandastarǧa 5 jyldan keiın azamattyq beru syndy Qazaqstannyŋ Täuelsızdık turaly deklarasiiasyna, QR Konstitusiiasyna jäne halyqaralyq zaŋdarǧa qaişy zaŋ da şyqqan bolatyn.
Qaŋtar oqiǧasynan keiın «Almatyda köterılıske şyqqandardyŋ arasynda şetelden kelgen aǧaiyndar köp eken» degen qaŋqu söz taǧy şyqty. Ony anau-mynau emes, elımızge belgılı zaŋgerdıŋ auzymen aitqyzsa, būl joly ataǧy da, syilyǧy da köp jazuşy alystan kelgen aǧaiynǧa auyz salypty.
«Syrttan kelgenderde «memleket mındettı» degen közqaras baiqalyp qalyp jatady. Iаǧni atajūrtyna oralǧandarǧa «memleket materialdyq kömek körsetuı kerek, jūmys tauyp beruı qajet» deitınder de tabylady. Äitse de naryqtyŋ qataŋ zaŋy «alma pıs, auzyma tüstı» qoldamaitynyn ūmytpaǧanymyz jön. Arnauly orta, joǧary bılımı bolmasa da, joǧary jalaqy töleudı talap etetının de jiı estıp qalamyz. Olardyŋ negızsız talaby keide jergılıktı halyqtyŋ oiyn özgertıp, bilık pen būqaranyŋ arasyna jık salatyndai» dep jazypty jazuşy, Qazaqstannyŋ eŋbek sıŋırgen qairatkerı Älıbek Asqarov.
Basqanykı basqa, däl eldıŋ sözın söileidı degen Älıbek aǧadan mūndai söz kütpep edık, «şetelden kelgenderdıŋ joǧary bılımı joq» dep kekete söilegenı azdai, «olar halyq pen bilıktıŋ arasyna ot jaǧady» degen sözımen «ala qoidy böle qyrqatyn» alasa oiyn aŋǧartyp qaldy. Eŋbek sıŋırgen qairatkerdıŋ būl pästıgıne bız ūialdyq…
Osyndai jat piǧyldardyŋ kesırınen bız qazır qazaq köşın toqtatuǧa ainaldyq. Şyn mänınde, elımızde qazaqtyŋ sany köbeimei, qazaqtyŋ üles salmaǧy artpai, bızdıŋ myna memlekettı ūstap tūruymyz qiynǧa soǧady. Öitkenı qazaqtyŋ jerıne köz alartyp otyrǧandar az emes. Sondyqtan Qazaqstannyŋ täuelsızdıgın baiandy etemız desek, memleket qūruşy tūlǧalyq ūlt – qazaqtyŋ sanyn köbeitu basty nazarda tūruy kerek. Qazaqtardyŋ bolaşaǧy Qazaqstanda bolsa, Qazaqstannyŋ bolaşaǧy qazaqtyŋ sany men sanasyna qatysty. «Şetelden kelgender masyl boldy» deitın jetesız pıkırdıŋ jetegınde ketkenderdıŋ sözıne senıp, köpke topyraq şaşpaǧan jön. Atamyz qazaq «ala qoidy böle qyryqqan jünge jarymaidy» dep tekke aitpaǧan!
