Biyl elımızdegı 12 myŋ köpbalaly otbasylar memleketten jeŋıldıkpen üi alyp, qonystoiyn toilaidy. Seisenbı künı senatorlar «Tūrǧyn üi qatynastary mäselelerı boiynşa» zaŋ jobasyna engızılgen tüzetulerdı maqūldady. Özgergen zaŋ boiynşa jyldar boiy baspana kezegınde tūrǧan 6 myŋ otbasy jalǧa berıletın päterlerge ie bolady. Olar ai saiyn är şarşy metrıne 115 teŋge tölep tūratyn, satyp alu qūqy berılmegen baspanaǧa köşedı. Taǧy da 6 myŋ otbasy «Qazaqstan tūrǧyn üi qūrylys jinaq bankınen» jyldyq 2 paiyzdyq mölşerlememen arzan nesie alyp, arman bolǧan baspanasyna qol jetkızedı.
İndustriia jäne infraqūrylymdyq damu ministrınıŋ orynbasary Qaiyrbek Öskenbaev tüsındırgendei, zaŋ arqyly engızılgen «jalǧa berıletın baspana» degen ūǧym qoǧamdaǧy tūrmysy tömen toptardyŋ ökılderıne arnalǧan, satyp alu qūqyǧy joq, jalǧa berıletın tūraqty kommunaldyq qor qūruǧa mümkındık beredı. Ol 2019 jyldyŋ basyndaǧy esep boiynşa Qazaqstanda 28126 köpbalaly otbasylar üidıŋ kezegınde tūrǧanyn habarlady. «Köpbalaly otbasylardyŋ baspana mäselesın tezırek şeşu üşın jyl saiyn «Nūrly jer» baǧdarlamasy şeŋberınde 50 mlrd teŋge böludı qarastyryp otyrmyz. Jyl saiyn 6 myŋ otbasy jalǧa berıletın päterlerge ie bolady. 2025 jylǧa deiın 40 myŋ otbasyn qamtamasyz etemız. Jetı jylda būl maqsatqa jalpy kölemı 350 mlrd teŋge jūmsalady» dep mälımdedı Q.Öskenbaev.
Qūzyrly ministrlıktıŋ ökılı köpbalaly otbasylar öz baspanasyn satyp alǧanşa jalǧa berıletın päterlerde tūra beretının aitady. Atalǧan päterler osy jazda berıle bastaidy. Baspanany salu jäne daiyn üilerdı bölu mäselesın jergılıktı äkımdıkter rettep otyrady. Senatorlar engızgen tüzetuler jūmysy bar jastarǧa da baspanaly boluǧa jol aşady. Aitpaqşy, jūmys ısteitın jastardyŋ jeŋıldıkpen üi aluy üşın qandai kriteriiler belgılenetının Aqparat jäne qoǧamdyq damu ministrlıgı daiyndaidy. Elbasynyŋ tapsyrmasymen 2019-2021 jyldar aralyǧynda Nūr-Sūltan, Almaty jäne Şymkent qalalarynda jastarǧa jalǧa berıletın 1 myŋ päter salynady. Senat deputattary maqūldaǧan zaŋ jobasy Memleket basşysynyŋ qol qoiuyna jıberıldı.
