8 Nauryz halyqaralyq äielder künı

Älemı erekşe Äigerım

Adam almaityn asu joq-au, sırä?! Şyn niettense, jūmyr basty pende düniedegı bar belestı baǧyndyrady eken. Jiyrma jasynda jazataiym jol apatyna ūşyrap, aiaq astynan tösekke taŋylǧanymen, taǧdyrdyŋ tälkegıne moiymai, toqyma sehyn aşyp, bügınde käsıbın döŋgeletıp otyrǧan dizainer, käsıpker, qolarbada otyryp bileuden Qazaqstan qūramasynyŋ müşesı Äigerım Bolatovanyŋ ömırı oǧan aiqyn aiǧaq.

[smartslider3 slider=2343]

QazMU-dıŋ üşınşı kursynda oqyp jürıp, bır künde ekı ret jol apatyna tüsken Äigerım Bolatqyzy bel omyrtqasynyŋ synǧanyn estıgende, eseŋgıremeptı. Taǧdyrdyŋ basqa salǧan synaǧyn qaz-qalpynda qarsy alyp, tez es jidy. Şybyn janyn qoiarǧa jer tappai, perzentı üşın şyrqyraǧan ata-anasy men bauyrlaryn oilaǧanda, solar üşın synbauy kerektıgın tüsınıp, taǧdyrynyŋ baǧytyn özı qalaǧan arnaǧa būruǧa bel budy. Naǧyz eŋbek etıp, ülkenderdıŋ ümıtın aqtar jasqa kelgende qolarbaǧa taŋylǧany, ärine, janyna qatty batty. Degenmen, tumysynan jıgerlı qyz basyna tüsken taudai auyrtpalyqty eŋseruge tyrysyp, bolaşaǧynan küderın üzbedı, myqtylyq tanytty. Erteŋgı künge degen senımı, jaqyndarynyŋ mahabbaty men asqaq armandary beikünä boijetkendı alǧa qarai jeteledı.

Jan baǧu üşın tyrbanyp tırşılık etu kerek. Jüre almaityny bolmasa, basqa jerı sau ǧoi. Sondyqtan qol qusyryp qarap otyruǧa bolmaitynyn tüsıngen sätte Äigerım Astanaǧa köşu turaly şeşım qabyldady. Alǧan betınen qaitpaityn ärı alǧa qoiǧan maqsatyn oryndamai tynbaityn qaisar qyzdyŋ taŋdauyna eşkım qarsy kelmedı. Mūnda da qūr jatpai, toqyma toqumen ainalysady. Alǧaşynda ǧalamtordan üirenıp, qolmen toqudy bastaǧan boijetken köp ūzamai toqu maşinasyn satyp alyp, tapsyryspen jūmys ıstep, tabysyn eseleidı. Osydan alty jyl būryn Öskemennen köşıp kelgen dizainer qyz söitıp elordada öz brendın qalyptastyrady. Toqyma būiymdaryn dükenderge tapsyrys boiynşa äzırleidı. Bügınde Äigerım Bolatovanyŋ toqyǧan būiymdary tūtynuşylar arasynda zor sūranysqa ie.

– Ainalamdaǧy adamdarǧa quanyş syilaǧandy ūnatamyn. Daiyn zatty tapsyruşyǧa berıp, olardyŋ quanǧanyn körgen kezde toqu barysyndaǧy qinalǧanymnyŋ bärın ūmytyp ketemın. Qoldan jasalatyn būiym bolǧannan soŋ är kiımge janymnyŋ jylulyǧyn qosyp, toqyp jatqan adamǧa degen bır jaqsy tılegımdı aityp toqimyn. Jıptıŋ sapasyna barynşa nazar audaramyn. Qazır qaida barsaq ta, bankte, auruhanada kezek kütıp otyratyn zaman boldy ǧoi. Sondai sätterde bosqa otyrmai toqymamdy qolyma alyp, uaqytymdy tekke jıbermeuge tyrysamyn, – dedı Äigerım Bolatova.

İä, rasynda da jas käsıpker uaqyttyŋ qadırın jaqsy bıledı. Ärbır minutyn baǧalaidy. Künın, saǧatyn josparlap üirengen. Ünemı arbada otyratyndyqtan, qan ainalymyn jaqsartu üşın künıne bır saǧat tık tūrudy daǧdyǧa ainaldyrǧan. Onda da jai tūrmaidy, kıtap oqidy, äsırese aǧylşyn tılınde oqyǧandy jaqsy köredı nemese kompiutermen türlı eskiz, kiım ülgılerın jasap, jūmys ısteidı, keide tıgıp tūrady. Äiteuır är minutyn tiımdı paidalanady.

Muzykaǧa jany qūştar: dombyra, gitara sekıldı aspaptarda oinaidy. Sportpen şūǧyldanady. Elordadaǧy paralimpiadalyq jarystarǧa qatysuşylar jattyǧatyn ortalyqqa baryp, denesın şynyqtyru jäne symbatyn saqtau üşın aptasyna üş ret sonda baryp jattyǧady. Kürdelı qimyldardy qiyndyqsyz oryndaidy. Qolarbada otyryp bileuden aldyna jan salmaidy. Sonau bır jyly qala äkımdıgınıŋ «Ruhani jaŋǧyru» aiasynda alǧaş ret ūiymdastyrylǧan «Elorda jastary» premiiasyn «Jas käsıpker» nominasiiasy boiynşa jeŋıp alǧany bar. Turnikte tartylyp, suda jüzgendı jaqsy köredı. Sonyŋ bärıne baruǧa uaqyt tauyp ülgeredı, ärine, kölıkpen. Ony da özı jürgızedı. Eşkımge salmaq salmaidy.

«Sport adamǧa küş beredı, senımdılık syilaidy. Sondyqtan mümkındıgı şekteulı jandar, äsırese mülde otyra almaityndar köbırek jattyǧuy kerek, – deidı Äigerım Bolatova. – Men adamdardyŋ özıme aianyşpen emes, qyzyǧa qaraǧanyn qalaimyn. Qyz bala qaşan da ädemı, ūqypty bolyp jürgenı jön. Osyǧan basa män beremın, kütınemın. Erekşe qajettılıgı bar azamattardyŋ sportta belgılı bır jetıstıkterge jetıp, öz käsıbın aşyp, öner salasynda tanylǧanyn körgım keledı. Mümkındıgımız şekteulı bolǧanyna qaramastan, qalasaq bız de biıkterge samǧai alamyz».

Aituynşa, jol apaty onyŋ ömırın ǧana emes, köp närsege közqarasyn da tübegeilı özgerttı. Soŋǧy jyldar oǧan äsırese, tırı adamnyŋ bar baqyty, bar qyzyǧy bügıngı künde ekenın, sol sebeptı eşkımge iek artpai, är adam öz baqyty üşın ǧūmyr keşe bıluı kerektıgın ūǧyndyrdy. Ol ainalasyndaǧy adamdardyŋ özıne aianyşpen qaraǧanyn qalamaidy. Kerısınşe, arbada otyrsa da ünemı külıp jüredı, är närsenıŋ jaǧymdy jaǧyn köruge tyrysady. Keide bır jerlerge arbamen öte almai jatqanda bolmasa, köbıne özın on ekı müşesı sau adamdarmen teŋ sezınetının, jūrt bilep jatsa, arbada otyrǧanyna qaramastan eş qymsynbai bilei beretının jäne būl äreketı üşın ūialmaitynyn jasyrmaidy. Ruhynyŋ myqtylyǧyn körmeisız be?!

Ol ünemı qaiyrymdylyqpen ainalysyp, mūqtaj jandarǧa qoldau körsetıp jüredı. Şäkırt tärbielep, şeberlık sabaqtaryn da ötkızedı. Bügınde ömırlık serıgın jolyqtyrǧan Äigerım aqpan aiynyŋ soŋynda qalyŋdyq atanyp öz ūiasynan ūzatylyp, künı keşe aq kelın bop jas otaudyŋ tabaldyryǧyn attady. Jūbailardyŋ jūptary jazylmasyn, baqyttary baiandy bolsyn dep tılek bıldırdık.

«Men baqyttymyn, – dedı ­Äigerım qoştasarda. – Allaǧa şükır, būdan da jaman jaǧdailar boluy mümkın edı. Bıraq men barmyn. Sol üşın täube etemın. Adamdar keide qoldarynan ıs kelmei jatsa, syltau ızdep tūrady, jūmys joq, jaǧdaiym joq, densaulyǧym joq degenge tüsınbeimın. Kımge alaqan jaiamyz? Menıŋşe, ärkım öz betınşe ızdenuı kerek, tyrysuy kerek, alǧa qarai ūmtyluy kerek».

Sanamda «qaisar qyzdy mūŋait­pai mäpelegen, biıkke jetelegen osy ūstanymy eken-au» degen oi qylaŋ berdı. Özı de, ömırı de özgeşe Äigerımnıŋ tabandylyǧy, erık-jıgerı men batyldyǧy ainalasyndaǧylarǧa ülgı bolsa eken deimız.

Gülbarşyn ÖKEŞQYZY

 

Taǧyda

Pıkır üsteu

Back to top button