Keşe «Qazmedia ortalyǧynda» qoǧamdyq «Bas redaktorlar kluby» bırlestıgı Reseidıŋ «Muz-TV» arnasynyŋ bas direktory Arman Däuletiiarovpen kezdesu ūiymdastyrdy. Jüzdesu barysynda negızgı äŋgıme – 5 mausym künı «Astana Arena» stadionynda dürıldep ötetın «Muz-TV- 2015. Gravitasiia» syilyǧyn tapsyru räsımı töŋıregınde örbıdı. Sondai-aq, jinalǧandardy körşı memlekettı moiyndatqan qandasymyzdyŋ aralasatyn ortasy, onyŋ Qazaqstandaǧy şou-biznes, sonyŋ ışınde qazaq änşılerı turaly oiy jäne t.b. sūraqtar qyzyqtyrdy.
«Qazaqstanǧa ünemı alyp-ūşyp kelemın. Özge elde tusam da, osynda özımdı üiımde jürgendei sezınemın. Jalpy, Qazaqstanda nemese özge elderde maŋyzdy mädeni nemese sporttyq şaralar ötkızıletın bolsa ärı ondai şaralarda qazaqstandyqtar top jaryp jatsa, dostarym oǧan şyn quanyp, menımen bailanystyryp otyrady. Osy kezdesuge arnaiy daiyndalǧan joqpyn. Jüregımnıŋ tükpırınde, tılımnıŋ ūşynda ne tūr, sony aitamyn dep keldım. Erkın otyryp, syrlasaiyq» degen Arman Däuletiiarov ärı qarai özı basqaratyn telearnanyŋ elordada ūiymdastyryp otyrǧan auqymdy muzykalyq şarasy Qazaqstanǧa ne beretının baiandady.
Onyŋ aituynşa, «Muz-TV» syilyǧy sekıldı telearnanyŋ ärı memlekettıŋ bedelın köteretın älemdık deŋgeidegı şoudyŋ Astanada ötkızıluı Qazaqstannyŋ da älemge tanyluyna äserın tigızedı. «Syilyqty tapsyru räsımın tıkelei efir arqyly 100 million adam tamaşalaidy. Biyl ony köretınder qazaq muzyka önerımen barynşa susyndaidy. Qatysuşylar qyzyl kılemmen jürıp ötkende de, jeŋımpazdarǧa syilyqty tapsyru barysynda da Qūrmanǧazynyŋ küilerı, Ermek Serkebaev pen Älıbek Dınışevtıŋ oryndaǧan änderı sekıldı tek qazaq muzykasy oinalady. Osylaişa, ol bıraz adamnyŋ qūlaǧyna jetedı» dedı ol.
Jalpy, «Muz-TV- 2015. Gravitasiia» syilyǧyna dämelı reseilık änşıler Qazaqstan turaly oŋ közqarasta ekenın aita kele olardyŋ daiyndyǧynan da habar berdı. Mäselen, «Nikolai Baskov qazaq tılın üirenıp jatyr» degen aqparatty közımız şalǧan edı, Arman Däuletiiarov ony rastady. Sondai-aq, Dima Bilannyŋ tuysqan äpkesı Qazaqstanda tūratyny, «Diskoteka Avariia» tobynyŋ bır solisı Qazaqstanda tuǧany oǧan ülken jaŋalyq bolǧanyn jetkızdı.
Biyl jaŋadan qosylyp otyrǧan «Üzdık qazaqstandyq ärtıs» atalymynda Janar Dūǧalova, Qairat Nūrtas, Nūrlan Abdullin, «MuzArt» toby jäne Äli Oqapov öner jarystyrady. Arman Däuletiiarovtyŋ pıkırınşe, osylardyŋ qai-qaisysy atauly syilyqty aluǧa laiyq. «Öner bäsekesıne tüsıp jatqan qazaqstandyq änşılermen etene tanys emespın. Tek Qairat Nūrtaspen qosylyp än aitqanym bar. Qairat maǧan ūnady. Duettı jazdyrtqanda da ülken qoldau körsettı» dedı ol būl jönınde.
Janar Dūǧalova «Turkvision» baiqauyna qatysqanda Arman Däuletiiarov Resei atynan Qazan qalasyna baryp, qazylar alqasy müşelerınıŋ qatarynda otyrypty. «Şynymdy aitsam, basynda baiqauǧa Qazaqstannan qatysyp jatqan änşı baryn bılmeppın. Sony bılgenımde, «qinalǧan Jambyl jerı osy» jaǧdaiyna tap boldym. «Janar jeŋımpaz boldy» degende qatty quanyp, ornymnan tūryp şapalaqtadym. Ol äreketımmen özge qazylarǧa da «signal» berdım» deidı qandasymyz.
Onyŋ oiynşa, Qazaqstan men Reseidıŋ şou-biznesı salystyruǧa kelmeidı. «Maǧan qazaqstandyq ärtıster nege «Muz-TV-dan körınbeidı?» degen sūraq jiı qoiylady. Ol sūraqty maǧan emes, änşılerdıŋ özderıne qoiu kerek. Būl jerde qazaqstandyq änşıler «A-Studio» siiaqty Resei estradasyna şyǧuǧa talpynuy kerek, menıŋşe» dedı A.Däuletiiarov.
Sonymen, «Muz-TV» arnasy bas direktorymen kezdesu äserlı öttı. Bırde Alla Pugachevamen äŋgımelesu sätınde bala kezınde anasynan estıgen «Aq böpe» änın aityp bergenınen onyŋ jüregı qazaq dep soǧatynyna ilandyq. Jüzdesu soŋynda söz söilegen «Bas redaktorlar kluby» qoǧamdyq bırlestıgınıŋ prezidentı Bibıgül Jeksenbai da sony meŋzep, qonaqqa ūltymyzdyŋ aqiyq aqyny Mūqaǧali Maqataevtyŋ elektrondy kıtabyn syilady.
Amanǧali QALJANOV
