Bügınde bas qaladaǧy jeke menşık balabaqşalardyŋ qyzmet körsetu sapasy jaqsara tüskenı baiqalady. Bılım basqarmasy tarapynan qoiylatyn talaptardy ūqypty ūstanatyn bırqatar balabaqşalar memlekettık tapsyrysty da abyroimen oryndap keledı. Solardyŋ bırı dep «Erketai» balabaqşasyn aituǧa bolady.
Osydan üş jyl būryn aşylǧan aituly mekemede bügıngı taŋda 210 büldırşın tärbielenude. Oqu-tärbie jūmysy qazaq jäne orys tılderınde jürgızıledı. Eresek toptardyŋ tärbielenuşılerı qalauyna qarai aǧylşyn tılın de üirenude.
– Balabaqşamyz aşylǧan kezde jüzden astam bala qabyldaityn edık. Uaqyt öte kele ata-analar tarapynan sūranystar köbeie tüstı. Sodan bız körşı tūrǧan ǧimaratty da balabaqşaǧa ainaldyruǧa ūsynys tüsırdık. Bärı oidaǧydai bolyp, bügınde qanattas tūrǧan ekı ǧimaratta qatar jūmys jürgızudemız. Bölmelerımız de, oiyn alaŋdarymyz da keŋeidı, – deidı bızben äŋgımesınde balabaqşa meŋgeruşısı Natalia Rusak.
Bız balabaqşaǧa kelgende däl merekenıŋ üstınen tüstık. Tärbieşı Güljan Kögenbaeva jetekşılıgındegı ortaŋǧy toptyŋ baldyrǧandary «Altyn küz» merekesın ötkızıp jatyr eken. Äsem bezendırılgen oiyn-sauyq bölmesınıŋ däl ortasynda «Küz hanşaiymy» otyr. Balalar bolsa, hanşaiym
aldynda kezektesıp öleŋ oqyp, än salady. Bır sätte balalar jamyrap küzgı önımderdı körsetıp jatty.
Osy künı mektepaldy daiarlyq tobynda da «Qyz syny» baiqauy öttı. Salima Şarkenova tärbiesındegı balalar küzgı jemıs-jidekten salattar jasaudan, keste toqu, öleŋ aitudan synǧa tüstı. Köŋıldı ärı maǧynaly ötken baiqauǧa qatysqan barlyq balalarǧa syilyqtar berıldı.
Ǧalym QOJABEKOV
