«Astana Opera» teatrynyŋ İtaliiaǧa jasaǧan gastroldık sapary aiaqtaldy. Astanalyq öner ūjymy Genuia qalasyndaǧy «Karlo Feliche» teatrynda A.Jūbanov pen L.Hamididıŋ «Abai» operasyn (librettosyn jazǧan M.Äuezov) jäne älemdık klassika sanalatyn L.V.Bethovennıŋ №9 simfoniiasyn talǧampaz jūrttyŋ nazaryna ūsyndy
«Astana Operanyŋ» Appenin tübegıne būl alǧaşqy sapary emes. Osydan üş jyl būryn bas qala önerpazdary italiialyqtardy önerımen täntı etken edı. Osy joly arnaiy şaqyrtumen opera solisterı, simfoniialyq orkestr muzykanttary, hor, balet jäne mimans ärtısterı, grimdeuşıler, jaryqtandyruşylar, rekvizitorlar men sahna maşinisterı bardy.
Būdan būryn «Abai» operasy Germaniiada nemıs tılınde oryndaldy. Al İtaliiada būl opera qazaq tılınde tūŋǧyş ret şyrqaldy. Abai partiiasyn Qazaqstannyŋ eŋbek sıŋırgen qairatkerlerı, «Astana Opera» teatrynyŋ jetekşı solisterı Sündet Baiǧojin men Janat Şybyqbai oryndady. Ajar partiiasy Qazaqstannyŋ eŋbek sıŋırgen ärtısı, Memlekettık syilyqtyŋ laureaty Maira Mūhamedqyzy jäne Qazaqstannyŋ eŋbek sıŋırgen ärtısı Jannat Baqtaiǧa būiyrdy. Simfoniialyq orkestrge osy spektakldıŋ qoiuşy dirijerı, Qazaqstannyŋ eŋbek sıŋırgen qairatkerı, «Astana Opera» teatrynyŋ bas dirijerı Alan Börıbaev jetekşılık ettı.
«Astana Opera» teatry baspasöz qyzmetınıŋ habarlauynşa, «Abaidy» tamaşalauǧa halyq öte köp jinalyp, zalda ine şanşar oryn qalmady. Operany köruge Ahmet Jūbanovtyŋ nemeresı Tūrar arnaiy ūşyp keldı. Qoiylym aiaqtalǧan soŋ, körermender ärtısterden qoltaŋba aluǧa asyqty.
Tört bölımnen tūratyn, Şillerdıŋ «Şattyq» odasynyŋ mätınıne jazylǧan L.V.Bethovennıŋ №9 simfoniiasyna da jūrttyŋ yqylasy tamaşa boldy. Olar alǧan äserlerımen konsert aiaqtalǧan soŋ bölısıp jatty. Atalmyş şyǧarma däl osy zalda üş jyl būryn da oryndalǧan. Körermender astanalyq önerpazdarmen saǧynysa qauyşty. Önerde şekara bolmaitynyn osy gastroldık sapar qaita däleldedı.
