Säkentanu ılımı jaŋa eŋbektermen tolyqty. Qazaqstannyŋ eŋbek sıŋırgen ärtısı, önertanuşy Serık Ospanov QR Ūlttyq mūraǧatynda «Säken Seifullinnıŋ muzykalyq mūrasy» kıtaby men «Syr sandyq» atty Säken änderınıŋ SD üntaspasynyŋ tūsaukeserın ötkızıp, ülken tūlǧanyŋ 120 jyldyq mereitoiyna tamaşa tartu jasady.
Jaryq körgen tuyndylar, avtordyŋ aituynşa, bes jylǧy ızdenıstıŋ jemısı. Ūltymyzda «Amanatqa qiianat jürmeidı» degen söz bar. Sol ūltymyzdyŋ joǧalyp bara jatqan talai än-küiın qaraŋǧy qapastan jaryq künge alyp şyqqan, ädebiet, öner turaly söilese, tögılte jöneletın qara sözdıŋ jorǧasy, marqūm Aqseleu Seidımbek Serık ınısın Säkennıŋ muzykalyq mūrasyn zertteuge baǧyttady. Jazyla bastaǧan eŋbektıŋ qoljazbalaryn özı oqyp, aqyl qosyp otyrdy. Alaida, köpke ūzamai dünieden ötıp kettı. «Osydan keiın bastaǧan jūmysty qalai tastaisyŋ? Ony aiaqtau paryzym dep sanadym. Onyŋ üstıne Aqseleu aǧamnyŋ amanaty retınde qabyldap, qūlşyna tüstım» deidı Serık Ospanovtyŋ özı būl jönınde.
Irgelı ıstıŋ basynda Aqseleu tūrǧannan soŋ onyŋ baiandy aiaqtalmauy tiıs emes edı. «Säkennıŋ muzykalyq mūrasy» kıtabynyŋ alǧysözınde säkentanudyŋ bastaularynda tūrǧan ädebiettanuşy ǧalym Tūrsynbek Käkışev būl turaly: «Jinaq, äsırese, önersüier qauym üşın taptyrmas olja jäne būl eŋbek köpten kütken säkentanu ǧylymyna qosylǧan tyŋ, sübelı üles dep baǧalaimyn» deidı. Al, Qazaqstannyŋ Halyq ärtısı, qazaq än önerınıŋ bılgırı Qairat Baibosynov: «Säken Seifullin turaly jazylǧan eŋbekter ūşan-teŋız. Alaida, būl eŋbektıŋ erekşelıgı – tyŋ derekterge toly jäne qazaq önerınde bırınşı ret barlyq änderı notaǧa tüsırılıp tūrǧandyǧynda» dep baǧa beredı.
Şyndyǧynda da Säkennıŋ el arasynda «Tau ışınde», «Bızdıŋ jaqta», «Kökşetau», «Aqsaq kiık», «Syr sandyq» syndy köp bolsa bes-alty änı ǧana aitylyp jür. Al, kıtaptyŋ avtory onyŋ özge de änderın tauyp, onnan asyrdy. Jäne aitamyn degen muzykalyq sauaty bar änşıler lezde üirenuı üşın däulesker küişı, Qazaq ūlttyq öner universitetınıŋ oqytuşysy Janǧali Jüzbai men dästürlı änşı Qairat Aitbaevqa notaǧa tüsırtıp, taiǧa taŋba basqandai etıp kıtabyna engızdı.
Säken öz janynan än şyǧaryp qana qoimai, qazaq önerınıŋ ülken janaşyry boldy. Mäselen, Halyq komissarlary keŋesınıŋ töraǧasy qyzmetın atqaryp jürgenınde öner zertteuşı, etnograf Aleksandr Zataevichke «Qazaqtyŋ 1000 änı» jinaǧyn şyǧaru üşın 2480 rubl qarajat bölgızdı. Jaryssözge şyqqandardyŋ: «Onsyz da jetkılıksız respublika biudjetın Orynbordaǧy şeberhanalardy jaŋǧyrtuǧa, qyzyl äskerdı qarjylandyruǧa bölınsın» degenderıne qaramady. Özı de A.Zataevichke ekı küi, tört än oryndap berıp, jazdyrady.
Osy künderı Serık Ospanovtyŋ özı, änımen eldı tamsandyratyn Bekbolat Tıleuhan jäne jas änşıler oryndap jürgen «Aqtamberdınıŋ tolǧauy» syndy ozyq tuyndy da Säkennıŋ arqasynda elge jettı. Öz zamanynda qazaq önerınıŋ talai marǧasqalarymen aralas-qūralas bolǧan Säken mūny Şaşubai Qoşqarbaiūlynan jazyp alǧan eken.
Täuelsızdıgımızdı alǧan tūsymyzdan atauly merekelerde alystaǧy audan men şalǧaidaǧy auyldarǧa öner şaşu ärı medisinalyq qyzmet körsetu maqsatynda toqtaityn mädeniet poiyzdary da jaidan-jai oilastyrǧan dünie emes eken. Onyŋ «arǧy atasy» kezınde Säken ūiymdastyrǧan «Qyzyl keruen» bolyp şyqty.
«Säkennıŋ muzykalyq mūrasy» eŋbegınen osyndai jäne özge de köptegen jaza berseŋ tausylmas tyŋ derekterdı tabuǧa bolady.
«Syr sandyq» SD üntaspasyna kelsek, onda tūŋǧyş ret Säkennıŋ elge belgısız bolyp kelgen änderı tehnikalyq öŋdeuden ötıp, bırızdılenıp üntaspaǧa tüsırıldı. Jäne bır qūndylyǧy – aǧa buynǧa jaqsy tanys, alaida, jas ūrpaq dauystary tügılı attaryn bılmeitın Suat Äbuseiıtov, Maira Jürsınova, İgılık Omarov, Gülbarşyn Aqpanova syndy änşılerdıŋ oryndauyndaǧy änder taspalanǧan. Mūnda taǧy Säken «aqtardyŋ» qolyna tüstı degende äkesı Seifolla küŋırenıp şyǧarǧan «Qosbar» küiı men anasy Jamal süiıp oryndaǧan «Kidım kamzol» halyq änı de engızılgen.
Ekı eŋbektıŋ de jaryq köruıne memleket jäne qoǧam qairatkerı Oralbai Äbdıkärımov qoldau körsettı. «İgı ıs degende kömekterın aiamaǧan osy jäne özge de köptegen azamattarǧa Allanyŋ nūry jausyn!» deidı avtor.