«Aşyq esık» künındegı aşyq äŋgıme

Bırneşe kün qatarynan «Nūr Otan» qalalyq filialynyŋ keŋsesı men «Astana» konsert zalynda ötken aşyq esık künınde azamattardy memlekettık organdar men kommunaldyq käsıporyndar ökılderı qabyldady.

Şaraǧa Astana qalasy äkım­dıgı basqarmalary men audandyq äkımdıkterdıŋ, «Elorda qūrylys», «Astana LRT», «Astana su arnasy», «Astana REK», «Astana teplotranzit» kompaniialarynyŋ ökılderı qatysty.
Aşyq esık künıne keluşı elordalyqtar problemaly nysandardy salu, jer uchas­kelerın beru, öz betımen qosymşa qūrylystar men ǧima­rattardy räsımdeu, jekemenşık üilerdı būzu, qoǧamdyq kölık jūmysy, aialdama pavilondarynyŋ mäselelerı boiynşa jauapty mekeme basşylaryna tıkelei saualdaryn qoiuǧa mümkındık aldy.
Qabyldauda bolǧan är aza­­mat jeke tyŋdalyp, är sūraqqa tiıstı tüsınıktemeler berıldı. Endı aldaǧy uaqytta barlyq ötınış bo­iynşa atqaruşy organdar tarapy­nan qajettı şaralar qabyldanbaq. Kezdesu kezınde jergılıktı bilık ökılderı 120-dan asa adamdy qabyldady. Solardyŋ bırı Mäulet Smaqov jeke menşık mektep salyp, endı sonyŋ jūmysyn jürgıze almai jürgenın aitady.
– Bastauyş synyptaryna laiyqtap, 200 oryndyq mektep ǧimaratyn ekı jyl ışınde salyp şyqtyq. Ekı qabatty ǧimarat 700 şarşy metrden tūrady. 12 baladan eseptesek, 16 synyp şyǧady. Dälızı keŋ. Ashanasy bar. Qajettı jaǧdaidyŋ barlyǧy qarastyrylǧan. Aldaǧy qyrküiekte ıske qospaqpyz. Bıraq ony salǧanymyzdan qūjat jöndeu jūmystary qiyn bolyp kettı. Qolymyz­da äkımdıktıŋ qaulysy bar. Alaida talai tabaldyryqty tozdyrdyq. Osy mäsele boiynşa endı aşyq esık künıne tiıstı basqarma mamandarymen keŋesuge keldım, – deidı Mäulet Smaqov.

Äsırese astanalyqtar Qalalyq orta sapasy jäne baqylau basqarmasy mamandaryna köp jügınde. Türlı sūraqtarymen kezekte tūrǧan qala tūrǧyndaryn basqarma basşysy Tölegen Qūlūşevtıŋ özı qabyldady. Alaida audandyq äkımdık mamandarynyŋ üstelıne barǧan adamdardyŋ qatary sirek boldy. Onyŋ sebebın Qūrylys jäne tūrǧyn üi saiasaty basqarmasynyŋ basşysy Ruslan Ahmetov bylai dep tüsındırdı:
– Jaqynda ǧana audan äkımderı tūrǧyndar aldynda eseptık kezdesulerın ötkızdı. Audan äkımdıkterıne qatys­ty sūraqtardyŋ barlyǧy sol jiyndarda qoiyldy. Al qazır tūrǧyndar saualdaryn äsırese basqarma mamandaryna qoiyp jatyr. Aşyq esık künıne keluşılerdıŋ köpşılıgınıŋ sūraǧy baspana, jer uchaskelerı mäselesıne qatys­ty boldy. Endı osy sūraqtar boiynşa alda äkımdıkte jalpylama jiyn ötıp, sonda taldau jürgızıledı.
Aita ketu kerek, 15 aqpannan bastap azamattardy qabyldau audandyq äkımdıkterde de ötedı. Ondaǧy aşyq esık künı 22 aqpanǧa deiın jalǧasady.