Ardagerler – altyn tūǧyr
Keşe Kongress-holda Qazaqstan Respublikasynyŋ «Ardagerler ūiymy» qoǧamdyq birlestiginiŋ qūryluyna 25 jyl toluyna bailanysty saltanatty mereke bolyp ötti. Jiyndy aşqan Memlekettik hatşy Mūhtar Qūl-Mūhammed Elbasynyŋ ardagerler qauymyna arnaǧan qūttyqtauyn oqyp berdi.
«Ardaqty ardagerler! Sizderdi aituly oqiǧa – Respublika ardagerleri ūiymynyŋ qūryluynyŋ 25 jyldyǧymen qūttyqtaimyn. Eŋ aldymen barlyq ardagerlerge şynaiy rizaşylyǧymdy bildirgim keledi. Aǧa ūrpaqtyŋ eŋbegin tolyqtai baǧalau qiyn. Sizderdiŋ köpşiligiŋizdiŋ jastyq şaqtaryŋyz Ūly Otan soǧysynyŋ sūrapylyna tap kelgendikten, maidan dalalarynda erlik pen qaharmandyqtyŋ ülgisin körsete jürip şaiqasyp, Ūly Jeŋisti jaqyndattyŋyzdar. Soǧystan keiingi halyq şaruaşylyǧyn qalpyna keltiru jyldary da oŋai bolǧan joq. Sizder ol mindetti de ülken abyroimen oryndap şyqtyŋyzdar», – degen Elbasy lebizi ardagerlerdiŋ mereiin tasytty.
Qūttyqtau hatpen qosa Halyq qaharmany Saǧadat Nūrmaǧambetov bastaǧan birneşe ardagerge «Alǧys gramotalary» tabystaldy.
Mereitoilyq şara «Ardagerler ūiymy» respublikalyq qoǧamdyq birlestigi töraǧasynyŋ orynbasary Bekbolat Mūqyşevtiŋ baiandamasymen jalǧasty. Onyŋ baiandauynşa, 1987 jyly qūrylǧan ardagerler birlestigi el üşin maŋyzy zor köptegen şarualardyŋ basy-qasynda jür. Onyŋ işinde jastardy otansüigiştikke bauluda, adamgerşilikke tärbieleu isinde, Otanymyzdyŋ körnekti tūlǧalaryn däripteude eren eŋbek siŋirip, ülken belsendilik tanytatyn birden-bir ūiym – osy ardagerler birlestigi. Soŋǧy jyldarda birlestiktiŋ küşimen Ūly Jeŋistiŋ mereitoilary men respublikalyq ardagerler ūiymdarynyŋ atauly künderine arnalǧan 5 kitap jaryq kördi. Qazir būl ūiymda 730 myŋnan astam ardager bar. Olardyŋ eki myŋy – Qazaqstanǧa eŋbegi siŋgen qairatkerler. Törteui – Halyq qaharmany.
Ardagerlerdi qūttyqtauǧa Parlament Mäjilisiniŋ deputaty Dariǧa Nazarbaeva, Densaulyq saqtau ministri Salidat Qaiyrbekova, Eŋbek jäne halyqty äleumettik qorǧau ministri Gülşara Äbdihalyqova, Astana qalasy äkiminiŋ orynbasary Aida Balaeva jäne basqa da lauazymdy tūlǧalar keldi.
Jiyn soŋy öner maitalmandarynyŋ daiyndaǧan merekelik konsertine ūlasty.
Şynar ÄBILDA